Kota Marudu mokimaamaha momodimpot kabarakasan posorili
KOTA MARUDU: Pokionuon o tulun togumu tuh toririmo mintamong kabarakasan montok papaharo do posorili di abarakas, olumis om koidu mantad ayamutan rinomos ngawi mooi koinsodu mantad toruol rumoliu.
Minoboros ih Panakadai Montiri Kotundaan Rayat om Ahal Momoguno, Datuk Anita Baranting do tulun togumu kiguno kopio manamong posorili toririmo abarakas om olidas sabaagi laang monguhup porinta manamong toruol koligogon miagal orolian Virus Zika.
“Pokionuon ku kumaa toinsanan tinan kaamung noh agensi tulun ginumuan om misosondiri, tinan okon porinta, tulun moniaga ngawi om tulun togumu tuh toririmo minsingubas do kabarakasan id suang om labus lamin,” ka di Anita.
Anita ih nogi Puru Lamin Koundangan Pogun (Adun) Tandek minoboros ahal dilo ontok pinotimpuun do pitabangan tagayo hiti di kawawagu mikuo mokianu tulun togumu manahak pisokodungan poimponu kumaa bogian monguasa kinoiyonon.
Kawagu di Anita, papaharo o bogian dau do pialaan kolumisan om kabarakasan kampung di nampayatan 50 tinan kampung montok papatanom koulalahon oupus do kabarakasan om koposorilianan di olumis.
Namot dilo, pokionuon di Anita o Konsol Watas Kota Marudu tuh popogirotkuasa do kapatantu do kasalaan kumaa tulun ngawi di aiso tonggungan nokomoi kabarakasan montok papaharo do tonggungan songowian.
Namot dilo, Potunud Koupisan Kolidasan Watas, Dr Omar Kwang Kugan minoboros do gisom JanuraiOgos toun diti kiharo 65 kes pinoruput do kikompitan kes owiton togonok Aedes nga pinoboros do kooyuon natamangan om kawawagu kes noilaan id Kampung Samparita om Kg Talas.
Pinongintongan media ih linansanan di monunurat osimbayan, Benjohn Simbaku om Upisor Eksekutif Konsol Watas Kota Marudu, Jaipin Minsu nokoilo do rontob kabarakasan id bogian kakadaian kakaal momoguno do pisokodungan pomoruhang nokomoi tulun togumu doulu noh id posorili linominon poniagaan, pagawasan restoran om pagawasan tulun ginumuan.
Minomisunud ih Jaipin do bogian dilo haro pinapalabus do ‘ kompaun’ kuminaa piipiro nakasala kabarakasan om pinapaharo do pomorisaan id kadai ngawi taakanan om pinoposurat rontob kabarakasan miampai pinoposokot tanda potitikid onom wulan.
Pinitabangan dilo nampayat di mogisusuai koupisan om agensi porinta om kopohompit do pambarakasan soosomok toinsanan zon kakadaian.