Lahad Datu noliudan # Sunsuyon nopunso, hos waig noputut id Kg Silam, posikapon momonsoi pangantaban waig id Kg Sapagaya
LAHAD DATU: Kampung Sapagaya om Silam ih noindamaan naraag sabap noliudan koniab muhang porinta sumikap maganu laang manalasai do kobolingkangan kapanahakan waig tolidang om kounalan id kakampungan dilo.
Iti sumusuhut soosomok 500 mogigion id goduo- duo kampung dilo nakasou kaparagatan tikid tadau diolo sabap nopoputut ralan pakaayan id ralan tagayo om kotoguang antakan lumiud kagu ontok timpu rumikot.
Pemaju Mukim Silam, Mohd Hashim Mohd Hassan minoboros do kalapas minoi intong koiyonon di nongoliudan id Kampung Silam nokoilo isio do iso sunsuyon watu ih wau poh kopongo minomonsoi nopunso om ino nokopongimbulai do kobolingkangan sabap ino nopo nga ralan piromutan kiguno kopio montok mogigion kampung.
“Suai ko sunsuyon di nopunso, nopututan nogi mogigion kampung do kapanahakan waig tolidang sumusuhut hos waig noputu,” ka dau.
Hashim ih mongobi do mogigion ngawi bogian Mukim Silam mokianu tuh porinta om bogian ih pointantu sumikap manalasai do kobolingkangan dilo sabap ino nopo nga kapangawagat do mogigion kampung.
Namot dilo, id Kampung Sapagaya, maya pinongintongan nokoilo do waig tumimpuun kumudi soira rasam tuminodu di minsusuab.
Songulun mogigion kampung, Rasfairul Shah Abd Rashid minoboros do minongintong isio koyuon liud tuminimpuun kiikira jam iso minsusuab gisom notodu rasam.
“Id kampung diti haro ‘siren’ pongilo liud om soira ino do tumimpuun monguni tumimpuun yahai popoundaliu do barang doulu noh korita owiton doid koiyonon di lobi akawas.”
“Nga, sodop koniab siren aiso kinarangahan, noindamaan doti ologod tongus katapi mantad id jam tolu minsusuab kagu tuminimpuun oku minomosik puru paganakan om ruminomut paganakan id walai suai tuh kaanu sumodia,” ka disio.
Tumanud dau, potitikid timpu antakan lumiud tantu haro barang ih araag doulu noh koumatan lotirik om parabut id lamin dau.
Upisor Koburuon Rayat DUN Lahad Datu Amat Kawo ontok romuto minoboros, koyuon liud tagayo di nantakan id kampung dilo kinontodonon mantad projek pangantaban liud di au poh nowonsoi.
“Kogunoon mogigion id kampung dilo kopokianu kopio sabap potitikid timpu rumasam mogompus tantu noh do lumiud sumusuhut koluyungan waig di koluyung doid koiyonon di tototopot.”
“Alaid noh napalan projek dilo om alansan kopio porinta kaanu mongintong kogunoon rayat diti sabaagi toiso-iso di kiguno kopio sabap bogian diti alaid noh nokotoguang do kobolingkangan lumiud,” ka dau.
Luguan Balai Bomba om Manampasi Lahad Datu, Mohd Apandi Mahmood minoboros do tinimungan bomba nokotorimo pamalahauan id jam 1.42 minsusuab om minoi id Batu Lapan Ralan Silam.
“Tinimungan bomba minaganu laang miampai minongintong koiyonon dilo nga aiso pinawalihan pinapanau id tampat dilo om puru guminuli id jam 4.13 minsusuab,” ka dau.
Pinoilo nogi do aiso guas kayu nahaba toiko nunu noopo kinaraagan di kopotongob do pinoruput.