Posodiaon lobi ogumu kounalan tosonong OKU
TUARAN: Koporintaan Pogun doulu noh Komontirian Koporintaan Kinoiyonon om Pomulaminan pokionuon mooi koponuhu do bogian monguasa kinoiyonon (PBT) poposodia do lobi ogumu kounalan di tosonong kopio om otootopot montok tulun kosuaian winakas ( OKU) kaamung noh tinimungan haro kobolingkangan pongintongan.
Kopongunsuban dilo pinoboros di Porosiden Koisaan Tulun Naraag Pongintongan Malaysia toiko Society for the Blind in Malaysia (SBM), Hj Mohd Nazari Hj Othman.
Noboros disio kopokionuon dilo id pason dau id abaabayan ponutuban ‘ Bengkel Pengauditan Aksesibiliti OKU Penglihatan 2016’ bogian Pogun Sabah id iso hotel, hiti di tadau Koonom nakatalib.
Abaabayan dilo pinotimpuun di Panakadai Montiri Koporintaan Kinoiyonon om Pomulaminan Datuk Dr Joachim Gunsalam ih luminansan Montiri dau Datuk Seri Hj Hajiji Hj Noor.
Tumanud Nazari sabaagi wookon mantad kaparagatan lokusop dilo, minampayat ngawi nokopongintong do Kakadaian Tuaran sabaagi suntu om nokoilo do rontob ‘ aksebiliti’ kumaa OKU koinsasanai om tulun naraag pongintongan nopo nga osuriba kopio.
“Mantad dilo, mokianu yahai kumaa PBT dino nokomoi ino nopo nga Konsol Watas Tuaran tuh tumimpuun momusorou do poingkuro monginsonong kounalan montok OKU diti,” ka dau.
Minoboros isio do kobolingkangan ih iso’i noilaan id Projek Pomulaminan Rayat (PPR) id Taman Pomulaminan Sri Rugading om Telipok Ria hinonggo kiharo piipio tulun OKU pongintongan.
“Au tokou mimang kaantakan miagal OKU pongintongan aratu do id suang papas toi parit,” ka dau.
Namot dilo, Ponorikohon SBM Bogian Sabah Mery Rengegon @ Catherine nakapatahak noh kopoilaan toniiba di nongotimung asil mantad pinonoriukan om pogibabarasan lokusop dilo kuminaa Joachim montok iloon do porinta.
Joachim id pason dau minoboros do patahakon disio o kopoilaan dilo kumaa di Hajiji.
Id pason ih pinolombus di Joachim, pokionuon di Hajiji o molohing ngawi ih haro tanak ngawi OKU kaamung naraag pongintongan mooi rumijisto miampai bogian pointantu idsuang timpu tosisikap montok oilaan do porinta om mooi kotundunan diolo lobi ogompi.
“Tumanud do Sistem Ponorinaan Kopoilaan OKU ( SMOKU) gisom Jun 2016, kiharo kiginumu 388,566 OKU ih poinrijisto miampai Koupisan Kotundunan Rayat (JKM).
“Mantad dilo, pokionuon ku kumaa toinsanan tulun kaamung noh koisaan okon porinta miagal SBM Bogian Sabah om Koisaan Montok TulunTulun Bolou Sabah ih mongobi do kopontingan OKU id Sabah, au mongira id nonggo noopo, ih haro tanak ngawi OKU mooi rumijisto tosisikap montok popomilo diolo kapaganu do kounalan ih pinosodia di mogisusuai agensi koporintaan om misosondiri/poriwit,” ka dau.
Nokotindapou nogi id abaabayan dilo nga ih Potunud Eksekutif National Council for the Blind Malaysia (NCBM) Moses Choo om Porosiden Koisaan Tulun-Tulun Bolou Sabah Datuk Rosalind Chew.