Au kasala wookon 13 tirikohon wagu DUN Sabah patahakon kumaa calon tomulok - Khairy
KOTA BELUD: Boyoon Tinan Komulakan Umno Malaysia Khairy Jamaluddin kipomusarahan do au sala sokiro ko wookon 13 tirikohon wagu Lamin Koundangan Pogun ( DUN) id Sabah patahakon kumaa calon tomulok montok tumanding id pomilian timpu rumikot.
Minoboros ih Khairy do kosiwatan minog patahkon kumaa calon tomulok montok sumiliu pamalapau momuruan om nogi kaanu toilalaan om misokodung, mitalad miampai tulun laid idsuang pulitik.
Montiri Komulakan om Sipoot dilo minoboros do oruhangan agaras o porinta nung kapandaian om toilalaan tulun tomulok piomungon miampai tulun laid ih nogi mangajar, monontuduk om mangasa kobulihan kopomuruanan tulun tomulok.
“Onuai noh kosiwatan kumaa tanak tomulok... nokuro tanak tomulok au obuli poingkakaton id pomilian tagayo timpu rumikot.
“Okon toinsanan tokou mokianu katapi mokianu tokou di obuli tokou onuan do kosiwatan,” ka dau ontok minanahak boborosn id abaabayan ponutuban Karnival Varia- C Belia Muhibbah Kota Belud id Kampung Rampayan Laut, hiti konihab.
Tinan Monorina Pomilian Tagayo (SPR) pinoposurat do atag pamahagian tirikohon kawawagu DUN id Sabah kapaamung do Bengkoka, Mangaris, Pintasan, Pantai Dalit, Darau, Tanjung Dumpil, Dambai, Tulid, Telupid, Sungai Manila, Lamag, Segama om Kukusan.
Pinomoruhangan 13 tirikohon di pinolulus do Lamin Koundangan Pogun ontok Ogos pinoposiliu do DUN Sabah haro 73 tirikohon.
Idsuang ahal dilo, minoboros ih Khairy do calon Barisan Nasional om Umno katama tumoguang miampai isai noopo id pomilian tagayo rumikot.
Id ningkokoton suai, muhang ih Khairy do tinimungan omulok katama mimboros om kipomusarahan ‘kritis’ montok manahak pomusarahan toiko pongimbarasan sabap ino au kasala katapi posimoyon noh tuwa pomusarahan toi pongimbarasan dino kaanu monulung momuruan monorina om momonsoi porinta di lobi tosonong.
Au isio kaakun laang wookon tinimungan tomulok ih momonsoi ‘demonstrasi’ tindalanan montok paparatu do momuruan sabap laang irad dilo nopo nga au ‘demokratik’ om kasala mantad kawo undang-undang. -Bernama