TAWANI TALE NAI TUTU NI TUI LEVUKA NI OTI E 16 NA YABAKI

E totoka nida sarava na kena dei tu na veisema ni veiwekani kece sara ena vuku ni nodra sega ni tiko dei na veiwekani nira nanuma na vanua ena nodra via laki vakadinadinataka na veivagunuvi vakaturaga ena vanua o Nabukebuke. Era vakarautaka na nodra isulu ka vaka kina na kena ukutaki ni Bure na Vuvale mai na Vanua o Bau ka veitokoni talega kina na Vanua o Nadawa na vanua e drodro mai kina na medra wainisucu na Turaga Na Tui Levuka. Era laki vakaitavi talega na Minisita ni Tabacakacaka Itaukei, Tovo kei Na Iyau Vakamareqeti o Hon Ifereimi Vasu ka vaka kina na Tabana ni Veitarogivanua ena kena mai soli nai vola ni vakadeitaki vaka Matanitu ki vua na Turaga Na Tui Levuka. Ni mai cadra cake na Siga Vakarauwai e ra colata na vatavata na Batileka mai na koro o Vagadaci na nodra I tikotiko na Turaga na Tui Vagadaci , ka ra yadrava nai lakolako na bati balavu mai na koro ko Vuma na nodra itikotiko na Turaga na Tui Vuma. E ra mai Tawana tu na nodra bure ena loma ni bogi 4 ni bera nira laki sili ka akayacori talega na soqo ni vakamamaca kei na solevu ena itavi bibi vakavanua. Era sa mai tawana na nodra itikotiko o Ratu Etonia Seru Rokotuinaceva ena nodra itikotiko ka ra na qai laki sili tale ena tobu ka vakatokai me o Naivitabua ena koro ko Nukuloa, Gau. Oqo na sema ni veiwekani vakavanua ena vanua o Nabukebuke na nodra ni tikoitiko na Turaga na Tui Vatu kei na Tui Nuku. E na qai laki vakayacori na sili vakavanua oqo enai ka 2 ni macawa ni vula o Seviteba, 2024. Era sa buli ka vakatikori o Ratu Etonia Seru Rokotuinaceva ki nai tutu Vakaturaga na Tui Levuka. E soqo na Vanua, Lotu kei na Matanitu ena nodra mai Duavata kei na dela ni vanua o Nabukebuke ena nodra buli na Turaga na Tui Levuka. Era a buli taumada na Turaga na Tui Levuka enai ka 5 ni Okotova, 1993 o Ratu Kolinio Rokotunaceva ni se bera nira qai mai vakacegu ena yabaki 2008,ia sa mai nona na lagilagi o Ratu Etonia Seru Rokotunaceva ka nisa mai oti e 31 na yabaki na kena mai vakayacori tale na veiqaravi cecere vaka oqo. A laki vakasavui nai tukutuku ni veibuli kina vei delaniyavu era sema vakadra kina vanua , oqo e oka kina o Ratu mai Verata, Turaga na Tui Namosi, Turaga na Buli Solevu, Turaga na Tui Navatu mai Bua, Tui Kade mai Koro, oka talega kina na Turaga ni vanua ena Yanuyanu o Gau , Na Turaga na Tui Nuku kei na Turaga na Tui Vatu,era bau mai veitomani tale tiko ga na Turaga na Takalaigau mai Sawaieke kei na Turaga na Tui Wailevu e Lovoni.