CAVU I SAUSAU NA VANUA O NADONUMAI
Na tinikadua na mataqali ena koro ko Suvavou e ra mai marautaka na vei ka esa mai rawata na Nadonumai Holdings me vakatekivu taki mai na 1993 na gauna ea mai tauyavu kina nai matai ni nodratou taba vale ka vakatokai tiko na Suvavou House ena loma ni koro levu o Suva.
Era mai dolava na vale na Paraiminisita o Sitiveni Rabuka ena 1997. Ena ika23 ni Veverueri, 2023 e mai cereki kina e dua na drau ni veva vou ena kena mai vakananaumi nai 25 ni yabaki ni veiqaravi (Silver Jubilee)
Ena kena mai marautaki na sasaga oqo esa mai tavoca kina na Nadonumai Holdings nai tuvatuva ni kena tosoi tiko ga na veivakatorocaketaki ka sa tiko na ituvatuva ni kena tara tale e so na taba vale ka me tosoi talega na Suvavou House.
E mai vakayacori na soqo oqo ena siga Vakarauwai na ika27 ni siga ni vula ko Evereli, 2024 ka vakayacori ena Otela na Grand Pacific Hotel e Suva ka ra vulagi dokai kina na Minisita ni Qele kei na iYaubula o Hon Filimone Vosarogo, ka ra vakaraitaka kina na veitokoni mai na Matanitu Cokovata.
“Na noda mai tiko ena yakavi nikua e ratou vakarautaka na Nadonumai Holdings Limited e sa dua na cavu ikalawa vou ena kena tokoni na kabani ni Itaukei. Au via taura na gauna oqo meu vakanuinui vinaka vua na Turaga na Tui Suva , na Jiameni ni Nadonumai Holdings Limited , lewe ni matabose e cake kei ira na lewe ni timi ena vuku ni yalodina, veisau ka vaka kina na yalo ni vosota ena loma ni 25 na yabaki sa sivi”.
“Na kena mai rawati na Nadonumai Holdings esa dua na cavu ikalawa levu. Mai na gauna tauyavu kina ka sa mai cava sara ena dua na delana cecere ena kena mai rawati na vale taba 10 na Suvavou House.”
E kuria o Hon Vosarogo ena vuku ni kena cibitaki na Nadonumai Holdings esa dua na itavi bibi vei ira na kawa iTaukei ka vakauasivi ena veidinadinati mai na matanitu ena nodra tokoni nai taukeni vanua kei na veivakasama tale eso.
E na vuravura ni bisinisi nikua sa totolo sara na kena veisisivi taki na rawa ka e sega walega ni cavacava ni ka ia e sa dua talega nai lakolako vou. Sa ka bibi meda na taura e dua na gauna me vakasamataki lesu ka marautaki na rawa ka, vakadindinataki talega ena vuku ni cakacaka vakaukauwa kei na yalodina ka rawa kina e levu sara na veika vinaka.
Na nomuni rawaka e vakananumi keda ni gauna e dau soli kina na madigi ka vaka kina na veitokoni ena kena vakarautaki na cakacaka ,laveti cake tale nai vakatagedegede ni bula ka vaka kina na nodra rawaka na lewenivanua ena koro o Suvavou.
“E na vuku ni matanitu cokovata au cavuta na vakavinavinaka ki vua na Turaga na Tui Suva kei ira nai vakalesilesi ni Nadonumai Holdings Ltd ena vuku ni cau ni kabani ena bula vakailavo ni noda vanua”. E vakaraitaka talega ni na tu eso na bolebole ena lako curumi ka tu talega nai tuvatuva ena gadrevi mena rawati.
Na Nadonumai Holdings ena tosoya tiko na rawaka ka vakabauta nina rawati sara e levu na gagadre. Sa vakanuinui vinaka tu o Hon Vosarogo nina tomani tiko ga na sasaga ena Nadonumai Holdings.