Vakabulabulataki nai soqosoqo ni tabagone

Esasaga tiko vakaukauwa na tabagone ni yasana ko Namosi me ra maroroi na inuinui vinaka kei Nabukebuke e na veisiga ni mataka.

Oqo na veika e vakaraitaka ko Lario Rawaidrano Koroi na mata ni tabagone mai Namosi.

E 26 taucoko nai wiliwili ni koro ena yasana o Namosi, ka lima na tikina.

E vakaraitaka ko Lario ni vica na ituvatuva e sa qaravi tiko e na gauna oqo vei ira na itabagone. Oqo me vaka na nodra susu toa na itabagone mai Navunikabi ka vaka kina na porokaramu ni kena teivaki tale na kau dina me vaka ni sa yali tiko e daidai.

E vakaraitaka ni vakavinavinaka vakalevu kina matanitu e na nodra nanumi na itabagone me ra vakaitavitaki ira e na kena teivaki lesu tale na kau e na colo kei Namosi, me vaka na vesi, dakua, yasi kei na so tale na kau makawa era sa yali yani.

A sega ni toso vinaka tu nai soqosoqo ena loma ni 13 na yabaki, ka sa qai mai vakabulabulataki tale ena yabaki oqo.

E vakavinavinataka na Minisitiri ni Tabagone kei na Qito ena kauwai ni kena vakabulabulataki tale na itabagone e na loma ni yasana o Namosi.

E vakaraitaka ni gauna oqo e ra sa dau dabe tiko na komiti ni tabagone e na loma ni yasana ni oti e vula tolu ka me ra veitalanoataka na veivakatoroicaketaki kei na veika e sa yaco tiko e daidai e na kena sagai me valuti na waigaga ni veivakamatenitaki.

E tomana ni ra sa cakacaka tiko vakaukauwa e na kena valuti na meca oqo me kua ni dewa yani ena loma ni yasana.

E kaya me vaka ni vakamacalataka tiko na turaga ni ovisa ko Sakeo Ganivatu ni galu tiko ko Namosi ka sa tekivu me sa ciqoma tiko vakalailai e so na kisi ni waigaga e na colo kei Namosi.

E sa tiko na ituvatuva e na mua ni vula oqo e sa na qaravi tiko na veivakararamataki e na vei tikina e na kena sagai me valuti na waigaga ni veivakamatenitaki ka me rawa ni bucini o ira na kawa vinaka kei Namosi ni mataka.

E vakaraitaka ni sa nodra ituvatuva levu tiko e na loma ni tolu na yabaki mai oqo me ra valuta na kena dewa na waigaga ni veivakamatenitaki.

Na komiti ni tabagone ni yasana e sa sasaga sara tiko vakaukauwa me davo e dua na gaunisala me valuti kina ka me qaravi e dua na cakacaka me ra vakaogai kina o ira nai tabagone.

Veitaba: Leon Lord Na Minisita ni Veivakavaletaki ko Maciu Katamotu, ka lewe talega ni Bose ni Yasana ko Namosi ka vakayacori mai na Pearl Resort, Pacific Harbour, ena siga Lotulevu ena macawa oqo.