Na vuli e tekivu mai vale
Na veivakavulici e tekivu saraga mai vale. E na sega tale ni dua na vanua e ra vuli mai kina, e ra na vuli ga mai vale vei tina kei tama. E vakaraitaka na iliuliu ni marama e na Yasana o Kadavu ko Lusiana Duikete e na nodra vakalolomataki na gone e tekivu kece sara tiko ga mai vale e na nodra sega ni kauwaitaki vakavinaka.
E dau vakabibitaka vei ira na itubutubu marama ni oqo na noda itavi ka dodonu me da yadrava ka vakavulici.
E tomana ni dua ka vinaka na gauna ni vuvale, kevaka e da rawa walega ni yadrayadravaki na itubutubu e da na bucina e dua na vuvale mamarau ka vakakina e dua na Viti vinaka ni mataka. E na gauna e ra sa vakawelei na gone e na mona livaliva ka oqo saraga na vuna levu e vu tiko mai kina na veika e da sa rawa ni sarava tiko e na noda vanua nikua.
Tomana mai vanua na veika e ra rawa ni raica vei ira na gone na vakaveitalia, ka’ra sega ni yadravi vakavinaka na gone.
E vakaraitaka ni dua na malumalumu e laurai vakalevu tiko mai e nakoro oya na bula ni vakawelewele ka’ra dau vakaweletaka na nodra veisiko na veitabana ni matanitu e na kena sagai me vakararamataki na vanua se koro. Tomana ni dua talega na dredre levu e raica tiko mai nakoro oya na kena vakayagataki vakasivia na yaqona ka ra sega ni raica na gauna dredre oqo kei na bibi ni itavi e tiko ka sa dau vakacolati ga kina ko ira na marama.
E sa vakamamasu tiko ki vei ira na itubutubu ni veimatavuvale me ra dabe vata ka cakacaka vata me rawa ni valuti kina na ivalu levu sa yaco tiko e na noda vanua e na vukudra na luveda.
SOQOSOQO NI MARAMA
E vakaraitaka ni gauna oqo na isoqosoqo ni marama e Kadavu e toso vinaka tiko.
E ciwa na tikina e wili tiko na yasana ko Kadavu, e va na tikina lelevu ka lima na tikina lalai.
E na vica na macawa sa oti e ra vukei e 17 na koro ka’ra veivukei yani kina na matanitu o Ositerelia e na vuku ni Fiji Womens Fund, e na kena qaravi e so na bisinisi lalai e na sasaga tikoga ni veivakatoroicaketaki e na vuvale ka vakakina na vanua ni mataka.
E vakaraitaka ni cici vinaka tiko na isoqosoqo ka tiko ko ira na tiko e Suva ka tiko na isoqosoqo vei ira mai vanua. E vakaraitaka ni sa tiko na ituvatuva ka’ra sasaga sara tiko vakaukauwa na isoqosoqo ni marama ka’ra saga tiko e dua na vale me mai tara e Suva ka sa tiko na komiti me ratou qarava, ia na dredre ga e koto kina na kena voli na qele.
E ra sa soli tiko na marama e na sagai tiko vakaukauwa me voli na qele ka tara kina na vale ka me ra maroroi kina na gone ni Kadavu e ra mai vuli e Suva ka me na qaravi talega kina na bose ni yasana vakaoqo.