Kune na Mata ni Wai Vou e Nadakuni
Era sa marautaka na lewe ni koro mai Nadakuni, Waidina mai Naitasiri na kena sa kune e dua na nodra mata ni wai vou.
Na nodra mata ni wai vou, e tukuna na nodra gusu ni vosa ka lewena talega na Bose Lawa e na noda vanua, o Alivereti Nabulivou, sa na rawa ni ra gunu kina kei na koro o Nadakunivou.
Ko Nabulivou, e tukuna ni dua ga na tikini koro o Nadakuni, ia e sa toso sara tiko vakatotolo. Sa tekivu cakacaka tiko na Tabana ni Wai e na noda vanua (Water Authority of Fiji), e na kena vakadaberi ka me dodo na paipo ki na tani, me yaco sara kina veivalevale e na koro. E tukuna ni ra sa veivuke tale tiko ga ko ira na lewenivanua e na kena colati na paipo vata kei na kelikeli.
“Ko ira na lewenivanua era sega ni saumi,” e tukuna o Nabulivou. Na paipo e tukuna o koya ni sa veisau ka sa na vakayagataki na paipo lelevu, me drodro vinaka kina na wai. E sa na veivuke sara vakalevu na mata ni wai vou oqo ki vei ira na marama, e na nodra savasava kei na vakasaqa. E na veivuke talega vakalevu, e tukuna o Nabulivou kivei ira na gonevuli kei na qasenivuli. Na kedra kakana na dau cakacaka e tukuna o Nabulivou ni soli wale ka ra vakarautaka na lewenikoro. E tukuna talega ni mata ni wai vou qo e tiko e Wainadawa; na ka makawa e a tiko mai Wainigasau.
Na Cakacaka, e tukuna Nabulivou, ni dodonu me oti e na vula ko Seviteba.
Era vakavinavinakataka na matanitu na lewe ni koro e na veivuke e sa mai cakava me rawa kina vei ira mera na gunuva na wai savasava. Sa mai cava talega na nodra dau leqataka tu na wai. Na matanitu e sa vakaraitaka oti na Paraiminisita o Voreqe Bainimarama, ni na veivuke e na kena vagolei na wai savasava kina veikorokoro kece sara e na noda vanua.