Maibaum mit Ausblick
Bezirksrichter: „Sie müssen den Einsatz eines Hubschraubers bezahlen!“
Martin J., 42: „Des werdn ma erst sehn. I hab den Hubschrauber net bestellt. Was geht mi a Hubschrauber an, der was kummt und mi holt, wann i eahm net drum ersucht hab.
I bin damals am Land um drei in der Fruah von an Wirtshaus hamganga, des was um zwölfe Sperrstund hat, aber immer um einige Minutn überziagt, und hab am Hauptplatz an Maibaum stehn gsehn. I hab durch starken Alkoholgenuss an riesign Brand ghabt, und weil auf dem Maibaum unter anderem a Mineralwasser ghängt is, bin i auffekräult.
Es war net leicht. Der Bam war im Öl. De Bauernbuam fettn nämlich de Bam immer ein, damit eahner kaner aufekräult, aber i hab an altn Afrikanerschmäh angewendet.
De Einheimischen dort verwenden a Strickl, wanns auf a Palme kräuln wolln. I hab mein Hosnream gnumma. Als schlanker Mensch hab i mein Hosnream um mi und um den Maibaum schnalln könna, am letztn Loch is ses grad ausganga, und i bin auffekräult.
Obn war aa a Wurscht. I hab zerst des Mineralwasser trunkn, dann hab i de Wurscht gessn und drei Weckerln, de was ebenfalls obn ghängt san. Wann no a Schneidbrettl und a Messer obn ghängt war, wars direkt idyllisch gwesn, und wia i dann no a Portion Grammln, hängend im Plastiksackerl, vertüglt hab, san ma direkt de Schrammln ohganga.
Leider wars dann so, dass ma durch de vüle Fresserei der Bauch angschwolln is und i mit mein uman Maibaum gspanntn Hosnream nimmer obekönna hab.
I hätt ja Zeit ghabt. Im Zuge der Verdauung wär i wieder schlanker wurdn. Aber was war im Morgengrauen? A Hubschrauber hat mi gholt. Bei so an Morgengrauen muass an ja vurn Morgen grauen. I zahl de Wurscht und des Mineralwasser, eventuell no de Grammeln und de Weckerln, sonst aber mit Sicherheit nichts. Den Hubschrauber kann se de Feuerwehr in de Haar schmiern. So schauts aus!“
Der Bürgermeister, der den Rettungseinsatz veranlasst hatte, wird einvernommen werden.