Botërori i Klubeve fut në sherr Karlon me Realin
Ehëna duhej të ishte një ditë e qetë në Madrid. Reali është me pushime. Trajneri i vet, Karlo Ançeloti është me pushime. Por pikërisht një "bombë" e Ançelotit nga plazhi ka pështjelluar të gjithë ambientin e bardhë, duke krijuar dhe një përplasje mes palëve. Ka qenë një intervistë e Ançelotit për "Il Giornale", që ka shkaktuar polemika pa fund në Madrid që është shoqëruar me përgënjeshtrime nga ana e klubit dhe me një "mea culpa" nga vetë trajneri. Gjithçka lidhet me formatin e ri në futbollin e klubeve të propozuar nga FIFA (Kampionati Botëror për Klube) që do të nisë edicionin e parë në verën e vitit 2025 dhe ku do të marrin pjesë 32 nga skuadrat më të mira në botë, mes të cilëve dhe Reali i Madridit, si kampion i Europës. Por pjesëmarrja e "Los blancos" në botërorin e vitit të ardhshëm është vënë në mëdyshje as më shumë e as më pak por nga trajneri i ekipit Karlo Ançeloti në intervistën e tij dhënë për "Il Giornale"-n.
"GRUSHTI" I ANÇELOTIT - Duke iu referuar Botërorit të Klubeve (formati i ri), për italianen "Il Giornale", Ançeloti tha: "FIFA harron, se lojtarët dhe klubet nuk do të marrin pjesë në atë turne. Një ndeshje e vetme e Realit të Madridit vlen 20 milionë dhe FIFA dëshiron të na japë atë shumë për të gjithë evenimentin. Si ne, edhe klubet e tjera do ta refuzojnë ftesën". Kaq ka mjaftuar për të harruar gjithçka tjetër në intervistën e trajnerit të Realit dhe për t'u fokusuar vetëm në "bombën" e tij kundër FIFA-S dhe pjesëmarrjes së Realit vitin e ardhshëm në SHBA.
FORMATI - Formati i ri i Botërorit të Klubeve mund të cilësohet si një kompeticion i ri i hartuar dhe miratuar nga FIFA që do të marrë dritën jeshile në vitin 2025. Kampionati botëror i klubeve do të luhet vitin e ardhshëm në SHBA në periudhën 15 qershor deri më 13 korrik dhe në këtë edicion të parë do të marrin pjesë 32 skuadra dhe do të zhvillohen 63 ndeshje. Për momentin, klubet pjesëmarrëse në këtë kompeticion të ri janë ende të paqartë në lidhje me mënyrën e shpërndarjes së të ardhurave dhe natyrisht vlerën e tyre. Për momentin FIFA nuk ka zbuluar asgjë në lidhje me shpërblimet, sepse është në pritje të finalizimit të kontratës për të drejtat televizive.
PËRGËNJESHTRIMI NGA REALI - Intervista e
Ançelotit nuk mund të binte në vesh të shurdhër. Klubi i Realit të Madridit është vënë menjëherë në lëvizje për të sqaruar pozicionin e vet në lidhje me kompeticionin dhe deklaratën e trajnerit Ançeloti. Reali i Madridit ka lëshuar një deklaratë për të përgënjeshtruar Ançelotin dhe për të siguruar që klubi do të marrë pjesë në Kupën e re të Botës për Klube, e planifikuar të mbahet midis 15 qershorit dhe 13 korrikut 2025. "Real Madrid CF njofton se në asnjë moment nuk është vënë në pikëpyetje pjesëmarrja e tij në Botërorin e ri të
Klubeve që do të organizohet nga FIFA në sezonin e ardhshëm 2024-2025. Prandaj, klubi ynë do të garojë, siç është planifikuar, në këtë kompeticion zyrtar që ne jemi, duke u përballur me krenari dhe me entuziazëm maksimal për t'i bërë miliona fansat tanë në
mbarë botën të ëndërrojnë përsëri me një titull të ri", thuhet në deklaratë. MARRËDHËNIET ME FIFA-N - "Bomba" e lëshuar të hënën nga Karlo Ançeloti, ku la të kuptohet se Reali i Madridit mund të refuzojë të marrë pjesë në formatin
e ri të Kupës së Botës për Klube që FIFA që të zhvillojë verën e ardhshme në Shtetet e Bashkuara ka krijuar mjaft pështjellim. Por mediat spanjolle, "Mundo Deportivo", "Marca" dhe "AS" kanë bërë me dije se marrëdhëniet mes dy institucioneve janë të shkëlqyera.