Osmani: Të gjithë duan të na ndalin, por fiton Vllaznia
“Kemi ekip të shëndoshë, nuk ka lodhje te lojtarët”
Trajneri: Skënderbeu luan bukur, i kemi marrë masat
Vllaznia do të zbresë sot në fushë, teksa do të përballet me Skënderbeun vendës, në një sfidë ku objektivi i vetëm është të marrë një tjetër rezultat pozitiv për të vijuar rrugën e saj të pretendimeve për një vend në katërshen e parë. Trajneri Qatip Osmani e ka të qartë se kjo përballje do të jetë e fortë. Por, nga ana tjetër ai deklaron se skuadra e tij është e përgatitur për t’u ndeshur me një kundërshtar shumë të fortë. Në një intervistë të dhënë për mediat para nisjes për në Korçë, numri 1 i pankinës shkodrane iu është përgjigjur pyetjeve të gazetarëve.
Një ndeshje e rëndësishme përpara, si e prisni?
Për ne çdo ndeshje është e rëndësishme, veçanërisht kjo e radhës, por mendoj se jemi të gatshëm për të synuar marrjen e një tjetër rezultati pozitiv.
Përballë do të keni një skuadër solide dhe që luan bukur futboll, sa e vështirë do të jetë?
Skënderbeu është një ndër skuadrat që luan futboll të bukur, por ne i kemi marrë masat tona dhe udhëtojmë për në Korçë me plot optimizëm. E dimë se pas çdo ndeshjeje, çdo kundërshtar i radhës flet dhe shprehet se dëshiron ta ndalë Vllazninë.
Vllaznia ka një ecuri fantastike prej 12 javësh, do të vijojë kjo seri pozitive edhe në Korçë?
Çdo kundërshtar kërkon që të ndalë Vllazninë. Megjithatë ne nuk ngarkohemi psikologjikisht nga kjo gjë dhe shohim përpara. Ne kemi një ekip të shëndoshë, një ekip kompakt, i cili në të dy fazat e lojës luan shumë mirë, prandaj dhe do të bëjmë çmos që ta vazhdojmë këtë seri rezultatesh pozitive.
Shqetësim për portën?
Po të dy portierët e parë janë të lënduar, por njëri prej tyre mendoj se do të jetë i gatshëm.
Si duket gjendja e lojtarëve pikërisht nga numri i madh i ndeshjeve të zhvilluara?
Sigurisht që kjo ka ndikimin e vet. Por, mund të them se në stërvitje lojtarët
po tregojnë më të mirën. Barrën më të madhe e ka grupi i lojtarëve që po luan titullar nga ndeshja në ndeshje, por e cilësova se në stërvitje ato ndjehen mirë dhe besoj se këtë do ta bëjnë edhe në fushën e lojës.