Merkato, Milani flet... frëngjisht
Ibrahimoviç & Co, lojtarët kuqezinj që kanë qenë pjesë e kampionatit francez
Formacioni i Milanit këtë sezon duket se, përveç ngjyrave kuqezi, do të ketë të përbashkët edhe ngjyrën blu. Nuk bëhet fjalë për blunë e urryer të “kushërinjve” të qytetit, por për atë të një vendi fqinj, Francës. Jo vetëm lojtarë me kombësi franceze, por edhe ata që frëngjishten e preferojnë si gjuhën e tyre apo të tjerë që Franca i ka bashkuar në eksperiencat e kaluara, do të përbëjnë bazën e këtij Milani që po kërkon të formojë një ekip solid për të ardhmen. Për momentin lojtarët transalpinë të ekipit janë tre: Teo Hernandez e Pier Kalulu që janë e ardhmja e repartit të mbrojtjes dhe Majk Menja, që do të mbrojë portën pas bashkëkombësve të tij, me numrin që do shtohet me ardhjen e Olivie Zhirusë, të cilit do t’i duhet të mendojë për repartin e avancuar. Sulmuesi do të jetë francezi i njëzetë që do veshë ngjyrat kuqezi dhe i katërti për këtë sezon. Nuk kanë qenë kurrë kaq shumë, por në pritje të konfirmimit të Fode Balo-ture, i lindur në Paris edhe pse ka zgjedhur Senegalin për të përfaqësuar, dominimi francez do të rritet akoma më shumë. Në krye të të gjithëve qëndron një tjetër francez, Xhefri Monkada, shefi i zbulimeve dhe një nga elementët më të rëndësishëm të këtij Milani që me punën e tij kërkon t’i sigurojë ekipit talentet e reja, të cilat do t’i japin vazhdimësinë. Vite më parë, zbuloi talentin 12-vjeçar pas të cilit do të çmendej gjithë Europa, Kilian Mbape, dhe e bindi të firmoste për Monakon, interesat e së cilës mbronte. Mesfusha e Milanit është e prekur gjithashtu nga ky sindrom, gjë që e kanë konfirmuar vetë protagonistët. “Ne
komunikojmë në frëngjisht, për ne është më e thjeshtë dhe kuptohemi më mirë”, kanë pohuar Kesi e Benaser në shumë intervista me belgun Selemekers u bashkohet frankofonëve. Jo më pak të ndikuar janë edhe futbollistët e tjerë, eksperiencat e të cilëve
kanë pasur si pikë takimi ekipet franceze, si Kjaer, Leao, Tatarushanu, me dy të parët që kanë qenë pjesë e Lilës, ndërsa portierë si pjesë e Nantës dhe Lionit. I njëjti diskutim vlen edhe për liderin e kuqezinjve, Zlatan Ibrahimoviç, që gjatë katër viteve të
kaluara në Paris, arriti të bëhej golashënuesi më i mirë i ekipit. Tashmë në Milanelo do të flitet frëngjisht më lehtë se italisht, me trajnerin Pioli që përveç gjuhës së secilit do t’i duhet t’i mësojë ekipit një gjuhë të njëjtë për të gjithë, atë të suksesit.