Tare: Sarri përfaqëson futbollin e Lacios
Ditën e djeshme u prezantua trajneri i Lacios, Mauricio Sarri. Bashkë me të në konferencë ishte edhe Igli Tare. Fryma duket shumë pozitive dëshira për bashkëpunim gjithashtu. Të dy thanë fjalë të mira dhe tani është koha që ta tregojnë në fushën e lojës.
TARE - “Jemi të lumtur që të prezantojmë sot trajnerin tonë të ri. Dua të falënderoj Simone Inzagin dhe stafin e tij për punën e bërë në 5 vitet e fundit dhe i uroj fat për aventurën e tij të re. Sarri për ne është trajneri i duhur për të bërë një hap cilësor. Pas punës së shkëlqyer që ne dhe ai ka bërë në vitet e fundit ishte koha që të takoheshim. Sigurisht që do të kemi vështirësi në këtë sezon. Kemi marrë një trajner me eksperiencë, me lojë sulmuese dhe agresive. Ai do të përfaqësojë shpirtin e Lacios. I jap mirëseardhjen dhe shpresoj që të argëtohemi së bashku”.
SARRI - “Jam shumë i lumtur dhe i karikuar për këtë aventurë të re. Dua të shoh futbollistë me grintë dhe me dëshirë për të rikthyer Lacion aty ku e meriton. Në vitet e fundit është bërë punë e shkëlqyer, por shpresoj që të vazhdojmë në këtë rrugë. Drejtuesit më donin me çdo kusht dhe ja ku jam. Murinjo? Nuk do të jemi ne protagonistët, por futbollistët në fushën e lojës. Unë me Murinjon kam raport pozitiv dhe e konsideroj një njeri simpatik në botën e futbollit. Imobile? Mançini e aktivizon gjithmonë dhe kjo do të thotë se është i lumtur. Në fillim e nisi mirë Europianin në aspektin e golave, ndërsa tani po ndihmon skuadrën. Po pres me padurim që të punoj me të. Kam plane edhe për Korrean, i cili është një futbollist që më pëlqen shumë. Anderson? Fakti që unë kam dhënë lejen për transferimin do të thotë që e dua si lojtar”, tha Sarri. Më tej ai foli edhe për Luis Alberton. “Ky është një problem i skuadrës dhe i drejtuesve. Shpresoj që të zgjidhet sa më shpejt”, përfundoi ish-trajneri i Napolit dhe Juventusit.