Rikthehet Moçka, “pakt” për rrogat e prapambetura
Vjen edhe një brazilian nga Turbina, ngërç mbeten federimet
Rikthehet Shpëtim Moçka. Portieri ka dalë në stërvitje me Flamurtarin pas një mungese gati 5-mujore. Ai nuk ishte pjesë e ekipit gjatë fazës së parë, por pritet që të jetë nën urdhrat e Dritan Resulit për pjesën e mbetur të sezonit. Detyrimet e prapambetura nga sezoni i shkuar u bënë shkak i këtij “divorci”. Por, situata ka ndryshuar dhe më në fund është bindur që të kthehet në bazë. Një ditë më parë ai ishte me grupin, teksa ka startuar përgatitjet si lojtar i kuqezinjve. “Panorama Sport” mëson se ende nuk është firmosur, por pritet që kjo të ndodhë në ditët në vijim. Atij i ka përfunduar kontrata dhe do t’i duhet të nënshkruajë një të re. E ndërsa merkatoja vijon që të jetë e bllokuar, për gardianin nuk përbën problem. Ai është i federuar që nga sezoni i kaluar, ndaj mund të aktivizohet me rinisjen e sezonit. Burimet pranë klubit pohojnë për “Panorama Sport” se administratori Sinan Idrizi ka rënë parimisht dakord me portierin për pretendimet dhe kërkesat që ka, ndaj zyrtarizimi
nuk do të vonojë. Mësohet se 31-vjeçari ka kërkuar të paguhet për detyrimet që klubi i ka nga sezoni i shkuar dhe nëse kjo ndodh, ai është i gatshëm të japë kontributin e tij për Flamurtarin, madje edhe pa u paguar për këtë sezon në Kategorinë e Parë. Por, si kusht i vetëm mbetet likuidimi për detyrimet e prapambetura. Drejtuesit duket se ia kanë mbushur mendjen portierit për ta rikthyer, bashkë me premtimin se kërkesat e tij do të plotësohen. Gjithsesi, mbetet për t’u parë se çfarë do të ndodhë. Rikthimi i Shpëtim Moçkës ka qetësuar stafin teknik, pasi ai është një siguri e madhe për portën. MERKATO Pavarësisht se merkatoja për vlonjatët është e bllokuar, Flamurtari po punon për të afruar lojtarë të rinj. Kuqezinjtë “peshkojnë” në Cërrik dhe ekipit i është bashkuar në stërvitje edhe sulmuesi Paolo Rikardo, që u largua së fundmi nga Turbina. Braziliani ka qenë gjatë gjithë sezonit titullar me cërrikasit dhe do të mund ta provojë aventurën në Vlorë vetëm nëse hapet sistemi i regjistrimeve. Tarik Çmajcanin dhe Burak Menga nuk kanë mbërritur në Vlorë, pasi u larguan në fund të vitit të kaluar. Gjasat janë që ata të vijnë vetëm nëse merkatoja do të hapet. Të dy futbollistët u stërvitën gjatë fazës së parë me Flamurtarin, por nuk luajtën dot. Pjesë e ekipit në këto dy ditë të para përgatitjesh janë edhe Alvi Ahmetaj dhe Stiven Puci. Dy gjirokastritët janë me “sytë” nga zhbllokimi i merkatos.