Leverkuseni gjen Interin, Taulant Xhaka në çerekfinale
LIGA E EUROPËS / Kalon edhe Uolves e Sevija
Mbrëmjen e djeshme u mbyllën me sukses ndeshjet që kishin mbetur pezull nga 1/8-at e Ligës së Europës, pas të cilave është plotësuar faza çerekfinale, në të cilat do të jetë edhe një futbollist i Kombëtares së Shqipërisë. Bëhet fjalë për Taulant Xhakën, i cili ka arritur që të kualifikohet së bashku me Bazelin për në fazën tjetër, pas suksesit 1-0 përballë gjermanëve të Frankfurtit, me të cilët kishin barazuar pa gola në ndeshjen e vajtjes. Mesfushori kuqezi ishte në fushë titullar mbrëmjen e djeshme, por në minutën e 87-të iu desh që të akomodohej në pankinë (vetëm një minutë më pas erdhi edhe goli i
Frai, që vendosi kualifikimin), ndonëse në fund festa ishte e gjitha për të dhe shokët e tij, të cilët në çerekfinale do të gjejnë ukrainasit e Shahtjor Donetskut.
LEVERKUSEN-INTER Ndërkohë, përveç Taulant Xhakës dhe Bazelit avancon edhe Leverkuseni, të cilët do të jenë rivalët e ardhshëm të Interit, për një duel që parashikohet të jetë edhe supersfida e çerekfinaleve të Ligës së Europës. Formacioni gjerman bëri formalitetin mbrëmjen e djeshme, duke qenë se i kishte mundur Rejnxhërsat 3-1 në Skoci, ndërsa dje mjaftoi një gol i Diabi, në minutën e 51-të.
LAMTUMIRË ROMA - Në ditën që Roma ndërronte pronësinë e klubit, mbërritja e presidentit të ri nuk mund të kishte qenë më e hidhur, pasi Sevija, rekordmenia e Ligës së Europës, ka mundur "Ujkonjën" 20 me gola të Reguilon dhe El Nesirit, në pjesën e parë. Ky duel u luajt me ndeshje teke, pas shtyrjes
si rrjedhojë e pandemisë. Për Romën ishte një paraqitje e turpshme, ndërsa Sevija, edhe pse skuadra ndryshon vit pas viti, mbetet skuadra favorite e turneut.
UOLVES AVANCON - Në ndeshjen e fundit, Uolves kualifikohet përballë Olimpiakosit. Anglezët, të fortë edhe nga suksesi
1-0 në ndeshjen e vajtjes në Greqi, kanë përsëritur të njëjtin rezultat edhe në shtëpi, pas penalltisë së goditur saktë nga Raul Himenez, në minutën e 9-të. Kaq mjaftoi që miqtë helenë të dorëzoheshin dhe Uolves të meritonte kualifikimin mes 8 skuadrave më të mira të Ligës së Europës.