Bylisi, me laps në dorë për të evituar "play out"-in

Ballshiotët pësuan humbje në shtëpi 0-3 nga Laçi dhe duke parë fitoren e Vllaznisë me Kukësin, i kanë të lëkundura sërish pozitat sa i përket zonës "play out". Bylisi është vetëm dy pikë larg nga Vllaznia, por këtë të premte ka shansin të rikuperojë me ndeshjen që ka në shtëpi ndaj Luftëtarit. Skuadra e Dovedan e mbyll kampionatin në transfertë kundër Tiranës, teksa këto takime janë mjaft përcaktuese sa i përket evitimit të vendit të tetë. Ballshiotëve tashmë u duhet që të marrin minimumi 4 pikë për dy takimet e mbetura, gjithnjë nëse Vllaznia nga ana tjetër merr maksimumin. Gjithsesi, me një fitore të premten të ballshiotëve ndaj Luftëtarit dhe nga ana tjetër, lënie të pikëve të Vllaznisë në kryeqytet kundër Partizanit, gjithçka merr fund dhe Bylisi i shpëton zonës "play out". Ballshiotët janë të favorizuar në krahasim me shkodranët edhe sa u përket ndeshjeve direkte, pasi nuk kanë asnjë humbje, por një fitore në Shkodër dhe tri barazime (2 në Ballsh dhe një në Shkodër). Për sfidën me gjirokastritët, ballshiotët do të jenë të plotë. Në këtë ndeshje bashkohet me skuadrën edhe Ardit Peposhi, që mungoi ndaj Laçit. Drejt rikuperimit të plotë po shkon edhe Mario Barjamaj. Me rikthimet priten edhe ndryshime në formacion. Mallakastriotët do të luajnë me bluzinjtë të premten në orën 17:45 në stadiumin "Adush Muça", një shans për t'u shfrytëzuar në këtë moment delikat të garës për të besuarit e Dovedan. Dje ekipi ka zbritur në stërvitje ,sepse tashmë e gjithë vëmendja është te ndeshja e radhës.