I shpejtë dhe gjithçkabërës, Bentankur do marrë "komandën"
Trajneri Sarri e preferon sepse luan në çdo rol
Gjatë dy muajve në karantinë, në kokën e MauricioSarrit ka pasur mijëra mendime: për rikthimin, për kampionatin, për Champions-in dhe mbi të gjitha se si do të luajë Juventusi i tij kur të rikthehen. Dhe në këtë pikë, Sarri, i rikthyer prej disa ditësh në qendrën stërvitore, duket se një vendim e ka marrë: T'i besojë çelësat e skuadrës Rodrigo Bentankurit. Diçka na tha fakti që ai e zbriti si titullar në ndeshjen kundër Interit përkrah Miralem Pjaniçit dhe e konfirmoi idenë e tij duke i dhënë leje boshnjakut që të transferohet te Barcelona.
I SHPEJTË- Por çfarë pëlqen Sarri nga Bentankur? Çfarë e ka bërë t'i besojë një të riu 22-vjeçar duke bërë pak kontradiktë me faktin që Juventusi ka skuadrën më të vjetër në Serinë A? Uruguaiani, pavarësisht se ka më pak fantazi se Pjaniç, garanton më shumë shpejtësi në manovrën bardhezi, por edhe soliditet në aspektin mbrojtës. Diçka shumë e rëndësishme për Juventusin në këtë kohë, duke parë që sulmuesit nuk ndihmojnë shumë në fazën pa top. Pra: Benta është një organizator me më pak teknikë sesa Pjaniç, por më i kompletuar.
GJITHÇKABËRËS- Edhe për faktin se mesfushori uruguaian mund të bëjë disa role në mesfushë. Në këtë sezon, Rodrigo ka luajtur në të gjitha pozicionet: organizator, fantazist dhe mesfushor qendre i majtë dhe i djathtë. Interesant është fakti që ka bërë gjithmonë mirë. Dhe kështu, kur të rikthehen kampionatet, Sarri mund ta aktivizojë Bentankurin si një garanci. Në këtë fund kampionati jonormal, trajneri do të ketë nevojë për të gjithë, edhe për Pjaniçin, i cili pak kohë më parë dukej si një nga lojtarët më të paprekshëm tëJuventusit. Në fushën e lojës ka treguar se nuk po kalon momentin më të mirë të karrierës së tij.
PA FRIKË- Një tjetër motiv që ka bindur trajnerin Sarri është personaliteti i uruguaianit. Një provë e qartë për të kuptuar këtë është ndeshja kundër Interit në"San Siro". Rodrigo u fut në fushën e lojës në pjesën e dytë (në vend të Khedirës) dhe dha asistin për golin e dytë të Higuainit duke kontribuar në një ndeshje të rëndësishme. Bentankur nuk është nga ata lojtarë që i dridhen këmbët. I rritur në stadiumin "Bombonera" (Juventusi e mori në vitin 2017 nga Boka, duke e përfshirë në operacionin Teves), i ka bërë mjaft mirë. Arsye të mjaftueshme pse Mauricio Sarri ka vendosur t'i japë besim mesfushorit 22-vjeçar, i cili do të jetë e ardhmja e Juventusit.