Pogradeci, në krye me “manita”

Liqenorët tani kryesojnë të shkëputur nga Apolonia. Përmirësojnë edhe golavarazhin

Pogradeci është i vetëm në krye. Liqenorët kanë mundur thellë Turbinën dhe kanë përfituar nga barazimi i Apolonisë në Orikum. Pogradecarët tashmë janë kandidatët kryesorë për kalimin në Superiore dhe realisht po shijojnë atë që kanë besuar se do të bëjnë që në fillim. Tani presin qetësisht fazën e tretë, me një gjendje psikologjike mjaft të mirë. Ndeshja me Turbinën është luajtur pa praninë e sportdashësve, pasi Pogradeci është dënuar me 5 javë pa spektatorë nga Disiplina. Pjesë e liqenorëve është tashmë edhe shënuesi më i mirë i Kategorisë së Parë, Artion Alillari, i ngjitur në kuotën e 11 golave me dopietën e djeshme.

NDESHJA – Me fillimin e lojës, dominimi i pogradecarëve është i dukshëm. Ata e zhvendosin lojën në gjysmëfushën kundërshtare, ndërsa Turbina ngjeshet në mbrojtje. Alillari dhe Berberi humbin rastet e para, por rrugën e rrjetës e gjen Liçkollari në minutën e 8-të, kur pas një topi të larguar jashtë zone ai gjuan në gjysmëlartësi dhe kalon të tijtë në avantazh. Më pas vendësit e ulin ritmin, por qetësinë e tyre për një moment e prish MekNamara, i cili shënon golin e barazimit. Një top të harkuar nga këndorja, mbrojtja nuk largon si duhet dhe lojtari i Turbinës gjuan fort dhe shënon. Liqenorët kujtohen

se futbolli është i paparashikueshëm dhe krijojnë një mori rastesh për minuta me radhë, për të ardhur në minutën e 30-të, kur Shkullaku shënon golin e dytë me një gjuajtje nga jashtë zonës. Pjesa e dytë fillon mjaft e shpejtë dhe Santiago gjuan fort

drejt portës së Dramollit, i cili devijon në këndore. Shfaqet rrezikshëm Topllari, por Laroshi këtë herë devijon me vështirësi. Jahaj do të tentojë nga një goditje standarde, topi kalon mbi traversë. Në minutën e 55-të, nga një goditje dënimi Jahaj me zgjuarsi gjen të zbuluar

Topllarin dhe ky i fundit e kalon topin mbi kokën e portierit cërrikas për ta çuar në rrjetë. Alillari do të gjuajë në minutën e 70-të, por vetëm rrjetë e jashtme. Në fundin e ndeshjes ky futbollist bën gjithçka vetë, kalon mbrojtësit miq dhe realizon golin e 4-t. Në shtesë ai shënon edhe golin e pestë për Pogradeci dhe të fundit për këtë ndeshje. Pogradeci kthehet kështu në pozicionin që ka mbajtur për javë me radhë në Grupin B. Këtë herë u duhet ta ruajnë me më shumë fanatizëm vendin e parë për të qenë ata ekipi që ngjitet direkt në Superiore.