Armando Mezini protagonist, Lushnja kthehet te fitorja

Verdhejeshilët rikuperojnë diçka me 3 pikët e marra ndaj Ilirisë

Lushnja rikthehet te fitorja pas dy javësh, duke mundur 3-2 Ilirinë në stadiumin “Roza Haxhiu”. Një dygolësh i sulmuesit Armando Mezini në pjesën e parë dhe një gol i shënuar nga peqinasi Klejdis Branica në fillimet e së dytës i dhuruan tri pikë skuadrës së drejtuar nga trajneri Gjyla. Barazimi i përkohshëm i Denis Xhaferrit dhe goli spektakolar i Ledjon Xhymertit vetëm sa i japin kurajë Ilirisë që përgatitet për fazën e tretë me synim mbijetesën. Lushnjarët nga ana tjetër pretendojnë Superioren dhe me këtë fitore kanë rikuperuar diçka në tabelë, -2 nga Apolonia dhe -4 nga Pogradeci.

– Atmosferë e vakët në “Roza Haxhiu”, vetëm 300 shikues për të parë sfidën Lushnja-Iliria. Takimi nis me gol, teksa në minutën e 9-të Mone kroson nga këndi dhe Mezini godet bukur me kokë, duke e çuar

topin në rrjetë. Pas avantazhit lushnjarët kontrollojnë lojën me qetësi, por në minutën e 30-të Iliria barazon rezultatin. Pas një goditjeje të Doçit, portieri Haremi nuk e kontrollon topin dhe Xhaferri e shtyn sferën në rrjetë. Kundërpërgjigjja e Lushnjës është e menjëhershme dhe protagonist është sërish Mezini, i cili me një goditje të saktë brenda zonës i rikthen avantazhin Lushnjës, duke shënuar golin e dytë.

– Lushnjarët shënojnë golin e tretë pas një goditjeje dënimi në krahun e djathtë të sulmit. Mone kroson bukur, Branica devijon saktë me kokë dhe 3-1. Në minutën e 66të është Magani që kërkon të surprizojë portierin Shera, por goditja e peqinasit nga rreth 40 m përfundon jashtë. Ndeshja rihapet në minutën e 74-t, kur Xhymerti i shpëton mbulimit të Nakos dhe godet bukur, duke shënuar në trekëndëshin e djathtë të Haremit. Një gol spektakolar që e zbukuron ndeshjen. Loja është e hapur dhe argëton të pranishmit. Në minutën e 79-të Magani kroson nga e djathta, kapiteni

Canka kthen bukur me roveshiatë, por pak cm larg shtyllës së djathtë të Sherës. Një aksion spektakolar që ngre në këmbë të gjithë publikun. Rezultati nuk ndryshon dhe Lushnja fiton 32. Tani përgatitet për fazën e tretë.