Lëv mbush 60 vjeç: Fitoj sërish me Gjermaninë

Joakim Lëv festoi dje 60-vjetorin e lindjes. Trajneri i kombëtares gjermane ka pasur një javë të mbushur me intervista ku sigurisht më e pikasura ka qenë ajo në "Bild". Aty trajneri i "Pancerave" tregoi se mund të rikthente në skuadër dyshen e larguar një vit më parë, Myler-Humels. Por, vetëm një ditë pas deklaratës, Lëv konfirmoi për "Kicker" të njëjtën gjë. Më pas tekniku gjerman u shpreh se ëndërronte të fitonte edhe një titull të rëndësishëm me Gjermaninë përpara se të largohej.

Është një ndjenjë e çuditshme, nuk e besoj se kam arritur këtë shifër në jetë. Brenda meje jam ende një djalosh i ri që punon me pasion dhe dëshirë të madhe. Gjithsesi, është një privilegj të arrish këtë moshë, po mundohem ta shijoj çdo ditë të jetës sime, pa parë numrat. Në intervistën e fundit për "Bild" thatë se mund ta mendonit një rikthim të Myler-Humels. Vazhdoni ta keni këtë mendim?

Nuk ka ndryshuar shumë mendimi im para dy ditësh. Nëse lojtarët do të jenë në formë dhe do të tregojnë se sa të rëndësishëm janë për skuadrat e tyre, dera e kombëtares do të jetë gjithmonë e hapur për ta dhe për këdo. Ata nuk janë përjashtuar përjetë, por bindja ime ka qenë se ata nuk ishin të përshtatshëm për skuadrën, por situata ka ndryshuar.

Ishit pranë largimit nga kombëtarja pas Botërorit. Çfarë ndryshoi?

Zhgënjimi ishte i madh te të gjithë ne. Tifozët meritonin diçka më shumë dhe ne i lamë në baltë. Sigurisht që mendon edhe të largohesh, por drejtuesit e federatës ishin të mendimit për të vazhduar sërish, brenda meje kërkoja që të bëja gjithçka nga e para. Në fund vendosa që të qëndroja dhe ta dërgoja skuadrën aty ku i takon, në majë.

Është Europiani i verës një mundësi për ta bërë këtë gjë?

Është një kompeticion i rëndësishëm. Nuk fitojmë një Europian që nga viti 1996. Kualiteti që kemi në skuadër është i madh dhe nëse luajmë për një qëllim, jam i bindur që mund të shkojmë larg. Por, duhet të tregohemi realistë pasi në grup do të përballemi me dy skuadrat më të mira për momentin, Francën dhe Portugalinë. Nuk mund t'ju premtoj asgjë, por do të bëj gjithçka që kam për të bërë edhe një herë krenar çdo tifoz gjerman.