Grintë e tani edhe asiste, Konte shijon një super-Barela
Marko Tardeli e pagëzoi, duke thënë se pasqyrohet tek ai. Dhe nuk konsiderohet më habi: Nikolo Barela është "kali" që shkon gjithmonë deri në fund, që nuk tradhton as kur situata është e ndërlikuar dhe skuadra pëson rëniet e zakonshme. Ku e vendos, atje qëndron. Ku e vendos, ai zgjidh probleme. Udineze është konfirmimi i fundit. E kush e kujton më dëmtimin? Pak "regjisor", pak fantasist, golit në Kupën e Italisë të dielën i shtoi edhe topin për Lukakun që zhbllokoi ndeshjen dhe liroi Interin nga makthi i barazimeve. Një ditë, gjatë një interviste, mesfushori u kujtoi mediave italiane se nuk e njeh veten në fushë, që është i padurueshëm. Megjithatë, shtoi edhe se me Juventusin do të kishte qenë një duel me armë të barabarta dhe që Interi ka vendosur në kokë të ngushtojë diferencat. E morën thuajse për mendjemadh. Katër muaj më pas, historia po shkon pikërisht ashtu siç e kishte menduar ai. NJË SFIDË THËRRET TJETRËN Konte lë kokën pas tij dhe po e ndryshon. Në fillim të sezonit tha: "Nikolo mund të luajë vetëm prapa sulmuesve, jo përpara mbrojtjes si Brozoviç apo Sensi". Ishte fillimi i shtatorit. Barela është rritur edhe në këtë aspekt. Në Udine luajti pikërisht përpara mbrojtjes: i takonte atij puna e parë e "regjisorit", përveçse si "gardian" prapa shpatullave të Eriksenit. Dhe e kreu mirë detyrën, duke drejtuar shokët e skuadrës përtej "furtunës", përtej shkëndijave të Fofanasë dhe De Paulit. Ka një problem me kartonë e verdhë, sigurisht: me atë të Udines jemi në kuotën shtatë, mesatarisht nuk përfundon dy ndeshje pa u ndëshkuar me të verdhë. Ndër të tjera, ai vetë është cilësuar i padurueshëm. Por problemet, në fund, janë më shumë për kundërshtarët. Nga merkato nuk erdhi Vidal, Konte do të kishte dashur kilianin pikërisht për të mos i ngarkuar një peshë të tepërt Barelës gjatë sezonit. Nikolo është unik për nga karakteristikat në skuadrën zikaltër, nuk ka një të ngjashme. Dhe tani është gati të marrë mbi vete edhe këtë përgjegjësi. Sfida e radhës për të është në horizont. Trajneri i kërkon më shumë gola, të provojë më shumë konkluzionin, të jetë më shumë prezent në fazën realizuese. Ndërkohë, në dy ndeshjet e fundit, ka regjistruar një gol dhe një asist.