Dramë e Arsenalit, Lacio shpreson
Ekipi i Inzagit fiton pa Strakoshën dhe “lutet”, Taulant Xhaka mungonte për kartonë
Tek Arsenali tashmë pritet vetëtima në ditët në vazhdim, duke qenë se Unai Emeri rrezikon më shumë se çdo herë tjetër pankinën. Sikur të mos mjaftonte irritimi i tifozërisë, si rrjedhojë e rikthimit të Granit Xhakës në formacion, pas 31 ditësh mungesë (u ndëshkua edhe më të verdhë në të 87-ën, duke u vërshëllyer), ishte përmbysja e pësuar nga ana e Aintrahtit të Frankfurtit, e cila ndezi një protestë të ashpër në “Emirates”. Nëse londinezët vazhdojnë ende të kryesojnë Grupin F, por rrezikojnë shumë në ndeshjen e fundit ndaj Standard Liezhit, në transfertë, përmbysja e firmosur në pjesën e dytë nga dopieta e Kamadas, pas avantazhit momental të Obamejangut, në sekondat shtesë të pjesës së parë, ka bërë që krisja mes tifozërisë dhe trajnerit spanjoll të jetë shumë e madhe. Dhe, ndoshta, duke akumuluar edhe çështjen Xhaka apo edhe gjithçka tjetër, ndoshta në orët e ardhshme mund të vijë edhe divorci mes palëve.
SHQIPTARËT PUSHIM – Nëse Bazeli humbi dje në transfertën ruse, përballë Krasnodarit, me rezultatin 1-0, Lacio do të kërkojë që të shpresojë deri në fund për një kualifikim të mundshëm, pasi mundi rumunët e Kluzhit gjithashtu me rezultatin minimal, në stadiumin “Olimpiko”. Në radhët e zviceranëve, siç dihej që nga ndeshja e kaluar, mesfushori i Kombëtares së Shqipërisë, Taulant Xhaka, mungonte për arsye kartonësh, ndonëse disfata me Krasnodarin nuk shkakton probleme, pasi Bazeli është kualifikuar tashmë për në 1/16-at e Ligës së Europës. Ndërsa Lacio, e cila kishte vendosur që ta linte pushim titullarin Thomas Strakosha, duke ia besuar portën Protos, i ka mjaftuar një gol i Korreas në pjesën e parë dhe shifrat nuk ndryshuan deri në fund. Për të kaluar në raundin tjetër, Strakoshës me shokë do t’i duhet që të fitojë ndeshjen e fundit ndaj francezëve të Ren, por në të njëjtën kohë të shpresojë që Sëlltiku të mundë Kluzhin.