Kanë pësuar 14 gola, Shimaj: Na jepni kohë të harmonizohemi
Egzon Shimaj ka gjetur veten në Kavajë. I ardhur nga akademia e Vllaznisë, 18-vjeçari ka zënë direkt një vend në formacionin e Gugash Maganit. Në një fazë të luajtur, është aktivizuar 635 minuta pas 8 ndeshjeve. Dhe për një të ri të moshës së tij, nuk janë pak. Gjatë një prononcimi të dhënë për “Panorama Sport”, ai nuk ngurron që të falënderojë klubin dhe stafin që po i japin mundësinë të rritet. “I jam mirënjohës stafit teknik të Besës e drejtuesve të tjerë të saj, që më kanë vlerësuar e çmuar duke luajtur sistematikisht. Prej kësaj erdhi dhe ajo përvojë e rëndësishme, që ishte përfshirja dhe aktivizimi im me Kombëtaren U-19 dhe në turneun e fundit për kualifikueset e europianit, që u zhvilluan disa ditë më parë në Belgjikë”, u shpreh fillimisht shkodrani.
MBROJTJA – Besa ka shfaqur probleme me golat, ndërsa deri më tani numëron 14. E megjithatë, Shimaj mendon se mbrojtja nuk është aq rëndë sa duket. Në një prapavijë tërësisht të riformatuar, problemi i vetëm është harmonizimi, që natyrisht kërkon kohën e vet. “Edhe pse janë pësuar 14 gola në 9 javë, është një shifër që nuk korrespondon më atë nivel që kemi treguar. Çdo gjë do të shkojë në vendin e vet. E ndesh përditë në stërvitje frymën e bashkëveprimit pozitiv të mbrojtësve me njëri–tjetrin, këshillat e çmuara që na jep trajneri ynë Gugash Magani. Ai di çdo detaj për këtë repart, sepse në tërë karrierën e tij të gjatë si futbollist, ka qenë mbrojtës model. Edhe mosha e re e futbollistëve, që ka aktualisht ekipi kavajas, më shumë se gjysma e futbollistëve janë të vitlindjes 2000 e 2001, tregon edhe një herë më shumë për një perspektivë të shëndetshme që e pret Besën.
RINGRITJA – Ecuria e Besës nuk ka qenë aspak mirë, për të mos thënë që janë shumë larg pritshmërive. Vendi i 6-të nuk i shkon aspak për shtat, e megjithatë në Kavajë janë të bindur se ringrtija do të fillojë në fazën e dytë. Mbrojtësi është i bindur që skuadra e tij do të jetë në katërshen e parë të tabelës pas mbylljes së pjesës së parë të sezonit. “Do të ngjitemi në grupin e skuadrave të katërshes së parë, për të vështruar edhe më lart. Kjo as që diskutohet”, përfundoi Shimaj.