Nga Lautaro-Sensi te Rakitiç-Vidal, ndizet aksi Milano-Barcelonë
Intensifikohen bisedimet e merkatos mes dy klubeve
Paraqitjet e fundit të Lautaro Martinezit nuk kanë nevojë për komente të veçanta. “Demi” argjentinas, vetëm 22 vjeç, ka marrë mbi shpatulla sulmin e Interit falë golave dhe spektaklit të dhuruar që kanë ndezur publikun zikaltër. Tani numri 10 interist ka nisur të tërheqë vëmendjen e klubeve të mëdha europiane, mbi të gjitha, të Barcelonës. Nuk është sekret që katalanasit janë në kërkim të një qendërsulmuesi për verën e ardhshme në sajë të faktit që në janar Luis Suarez do të mbushë 33 vjeç. Portali spanjoll i “Mundo Deportivo”-s, e përditshme e mirinformuar rreth lajmeve me skuadrën “blaugrana”, nënvizon se në krye të listës ndodhen edhe Kiljë Mbape, Herri Kejn dhe Markus Rashford, por Lautaro mund të përfshihet në një maksi-operacion, duke konsideruar interesimin e Interit për Ivan Rakitiçin dhe Arturo Vidalin dhe nuk është e vetmja arsye.
- Emisarë të klubit zikaltër i janë drejtuar Spanjës gjatë kësaj jave për të thelluar situatën lidhur me mesfushorin kroat, në krisje me ambientin iberik dhe me dëshirën për të gjetur një sistemim të ri që në merkaton e janarit. Për momentin, mes kërkesës dhe ofertës mbetet e madhe, me Barcelonën
që niset nga një vlerësim prej 35 milionë eurosh, por raportet e mira mes dy klubeve dhe gatishmëria e vetë lojtarit mund të rezultojnë thelbësore. Qëndron mundësia e pagesës me këste, nuk pranohen shkëmbime: Interi do të prezantohet me një shifër zyrtare, në rast të kalimit
të grupit në Ligën e Kampioneve, kusht i vendosur nga futbollisti. Megjithatë, duke u mbështetur te mosha, nuk mendohet se Marota dhe Auzilio do të mundohen tepër, edhe pse vetë Antonio Konte do të parapëlqente një mesfushë më fizike dhe dinamike. Arsye për të cilën preferohet Vidal.
JO VETËM SENSI
- Gjithmonë duke u bazuar tek i njëjti burim, mësohet se ekziston edhe një tjetër lojtar i Interit në radarët e katalanasve. Në fakt, janë dy, edhe Milan Shkrinjar, po mbrojtësi është i pashitshëm. Bëhet fjalë për Stefano Sensin, i ndjekur që në kohët e Sasuolos, sot i shndërruar
në një zbulim te zikaltrit me Antonio Konten në pankinë. Me shumë mundësi klubi nga Katalonja do të përpiqet të përfshijë kartonin e mesfushorit në bisedimet për Rakitiçin apo Vidalin, pavarësisht se në Milano e konsiderojnë Sensin një yll të projektit të së ardhmes.