Kristo Shehu refuzon ftesën e Rejas dhe zgjedh Greqinë
Sulmuesi i Panathinaikosit i thotë jo Kombëtares shqiptare
Lista e futbollistëve shqiptarë, të cilët duan të luajnë për Greqinë, është e gjatë dhe nuk ka ndërmend që të ndalet me kaq. Fiorin Durmishaj dhe Mario Vrushaj nuk janë të fundit, pasi kësaj liste shumë shpejt mund t’i shtohet talenti i Panathinaikosit, Kristo Shehu. Futbollisti me origjinë shqiptare ka refuzuar të grumbullohet nga trajneri Edi Reja për ndeshjet kundër Francës dhe Andorrës. Sulmuesi që aktivizohet me të rinjtë e Panathinaikosit është duke shkëlqyer në futbollin grek dhe tërhoqi vëmendjen e federatës shqiptare, aq sa trajneri Reja vendosi t’i dërgonte një ftesë. Ai i tha “jo”, por i ka lënë dyert e hapura për të ardhmen. Lajmin e bën të ditur “novasports” në Greqi, e cila shkruan se interesimi i kuqezinjve ka qenë konkret, por ai për momentin nuk është duke menduar aspak për Kombëtaren dhe dëshiron vetëm që të rritet si futbollist me skuadrën e tij.
“Nuk kam vendosur ende nëse do të luaj për Kombëtaren shqiptare apo për kombëtaren greke. Është diçka për të cilën nuk kam menduar aspak. Dua vetëm që të përmirësohem dhe të rritem si lojtar”, ka thënë talenti 19-vjeçar.
- Trajneri Edi Reja
ka nisur një fazë revolucioni dhe po afron në Kombëtaren shqiptare shumë futbollistë të rinj. Dëshiron që t’ua japë mundësinë të gjithëve lojtarëve që shkëlqejnë me ekipet e tyre dhe që janë premtues për të ardhmen. Njëri prej tyre është Kristo Shehu, i cili sezonin e kaluar me të rinjtë e Panathinaikosit
arriti të shënonte 14 gola në 18 ndeshje të luajtura. Trajneri italian vendosi që ta shihte nga afër performancën e lojtarit në sfidën e moshave kundër Klovers dhe u bind se Shehu mund të ishte një element i rëndësishëm për të ardhmen. Por, ai e refuzoi këtë ftesë dhe disa media të tjera greke shkruajnë se dëshira e madhe e lojtarit Shehu është të luajë me kombëtaren e Greqisë. Më parë ai ka përfaqësuar ngjyrat kuqezi në Kombëtaren U-17, por vendosi që të luante për Greqinë U-19.
- Duket se ajo që i ndodhi Fiorin Durmishajt nuk i ka trembur aspak shqiptarët e tjerë që duan të luajnë për Greqinë. Edhe sulmuesit vlonjat i premtuan “parajsën”, por thjesht sa e dogjën në një ndeshje pak minuta. Tani ai nuk grumbullohet më nga helenët, por gjithashtu u largua edhe nga skuadra e Olimpiakosit, ku në verë u transferua me shumë bujë.