Ngec Junajtid, Uolves mbetet tabu

Pogba tradhton "djajtë", francezi humbet penalltinë që e debatoi me Rashfordin

Barazimi i parë sezon al për Mançester Junajtidin, që në fund të një ndeshjeje me dy fytyra, nuk arrin të thyejë murin e ndërtuar nga Uolverhemptoni. Të shkëlqyer dhe të vendosur në pjesën e parë, skuadra e Solskjaerit del e vetëkënaqur në të dytën, duke pritur reagimin e "ujqërve" të Nuno Espirito Santos, që konfirmohen tabuja e tyre (e mposhtën 2 herë në tri përballjet e sezonit të shkuar). Golit të Marsialit në minutën e 27-të iu përgjigj Neves në fillim të pjesës së dytë me një perlë nga distanca. Pogba pati shansin për të rikthyer Mançesterin në avantazh në minutën e 68-të, por u hipnotizua nga Rui Patrisio. Emocionet e para i dhurojnë dy aksione personale të Raul Himenezit dhe Markus Rashfordit. Mbrojtësit gjunjëzohen, mes të cilëve edhe më i shtrenjti në histori, Meguajër, por nuk vjen asnjë goditje në portë. Numri 10 i Junajtidit do të gjente edhe Marsialin, por francezi gabon në momentin e fundit. Kombinimi i tyre shkon më mirë në minutën e 27-të, kur ish-talenti i Monakos mposht Patrision me një diagonale të fortë me të majtën. Për të, goli numër 50 me fanellën e "djajve". Dhe, mund të vinte edhe i 51-ti, nëse nuk do të ishte treguar konfuz me topin pas një gabimi të mbrojtjes së vendësve. Pas pushimit, Santos ndryshon diçka nga skema e tij 3-5-2: jashtë Doherti, brenda Traore. Dhe, është pikërisht sulmuesi ai që fiton goditjen e dënimit që sjell rrezikun e parë për De Gean me Himenezin. Një minutë më vonë, Uolves barazon me të djathtën fluturuese nga jashtë zone të Ruben Nevesit, e cila ndalet në trekëndëshin e De Geas. 60 sekonda emocione të një ndeshjeje që për periudha të gjata nuk prodhoi asnjë goditje në portë. Duhet një episod për ta rigjallëruar sfidën: Pogba është njeriu i duhur për ta vrarë mërzinë. Kampioni i botës penetron në zonë, Kodi e pengon dhe ka 11-metërsh. Debat me Rashfordin për të ekzekutuar penalltinë, ndërsa Rui Patrisio gjen këndin e duhur dhe frenon me këmbë francezin. "Molineux" shpërthen në festë. Vendësit rrezikojnë që të shënojnë edhe golin e nokautit, ndërsa Shou shpërdoron rastin e fundit në shtesë. Santos aktivizon në fund edhe blerjet nga Italia të Netos dhe Kutrones. Solskjaer i përgjigjet me Grinud dhe Pereira, por është tepër vonë. Mançester Junajtid shpërdoron rastin për t'iu bashkuar Arsenalit dhe Liverpulit në krye të klasifikimit, të vetmet skuadra të Premier Ligës që kanë pikë të plota pas 2 javëve të para.