Shfryn Dibala, gol dhe polemikë
Driblim dhe parabolë "alla Toti", por sulmuesi nuk feston dhe tregon emrin në fanellë
Sigurisht që Juventusi nuk kishte nevojë për trajner (Mauricio Sarri nuk udhëtoi me skuadrën në Trieste, pasi u bllokua nga një virozë gripale) për të fituar miqësoren me Triestinën, por as për Kristiano Ronaldon, i cili qëndroi në "Kontinaza", duke u stërvitur nën shoqërinë e djalit të tij, Kristianinjo. "Zonja e Vjetër", pavarësisht këtyre problemeve që patën bllokuar dy liderët më të mëdhenj të skuadrës, mund të jetë më në fund e lumtur, pasi kanë rigjetur një futbollist që i mungonte prej kohësh. Zërat e merkatos mund ta kenë nervozuar vërtet, por ndoshta kjo ka qenë gjëja më e mirë që mund t'i ndodhte Paulo Dibalës për t'u zgjuar. Teksa ndeshja e djeshme nisi me koret e tifozërisë së Triestes, "Paulo, qëndro me ne", argjentinasi iu përgjigj me një gol kryevepër, i cili vendosi dhe mjaftoi për të fituar 1-0 testin e fundit të kësaj vere, përpara debutimit në Serinë A, më 24 gusht, në orën 18:00, në transfertë ndaj Parmës. Dibala, i cili as që ka ndërmend të marrë parasysh apo të pranojë ndonjë opsion tjetër përveçse atij për të qëndruar me ngjyrat bardhezi, jo vetëm që ka rigjetur ritmin e kohëve të arta, por goli i djeshëm ishte edhe një polemikë e hapur
ndaj drejtuesve, që menduan dhe mendojnë ende ta shesin, për të arkëtuar një shumë prej 80-100 milionë eurosh. Në minutën e 38-të, Dibala merr një asist në qendër të zonës, por ndërsa i ndërron me finte drejtimin topit, duke nxjerrë blof mbrojtësin që
kishte përballë, e sjell sferën në këmbën e preferuar, por në vend të goditjes së fortë, ofron në mënyrë surprizë një parabolë "alla Toti", që e lë të ngrirë portierin kundërshtar. Ovacionet janë të gjitha për të, por festimi i zgjedhur foli qartë: asnjë buzëqeshje,
fytyrë e ngrirë dhe ngriti spaletet e bluzës, duke i treguar tribunës VIP emrin dhe numrin e tij. Dhe nuk ka rëndësi nëse në pjesën e dytë humbet një penallti që mund të dërgonte shifrat në 2-0, pasi ajo që po tregon së fundmi në fushë Paulo (dopietë
tri ditë më parë në miqësoren e "Villar Perosas"), konfirmon se "xhevahiri" bardhezi është kthyer. Dibala i vërtetë është kthyer dhe ndoshta mund të jetë pikërisht ai që duan të shesin me çdo kusht, "arma" e frikshme edhe për Champions-in.