Sherr, puthje dhe VAR, Siti ngec me Totenhemin
Aguero përplaset me Pep, por në fund bëjnë paqe
Si në prill, mes Mançester Sitit dhe Toten hemit ka përsëri spektakël. Dhe ashtu si në prill, në ndeshjen e paharrueshme të kthimit të çerekfinaleve të Ligës së Kampioneve, fati i buzëqesh Totenhemit. Këtë herë "Spërsat" nuk dalin nga "Etihad", duke festuar për një humbje të ëmbël, por për një barazim të ëmbël. I ëmbël, i djersitur, i supervuajtur, sepse 2-2 në Mançester nuk ishte rezultati logjik i një ndeshjeje të kontrolluar praktikisht nga minuta e parë deri tek e fundit nga kampionët e Anglisë, fajtorë që lejuan disa fikje të shfrytëzuara në momentin e duhur nga skuadra e Poçetinos (dy gola me dy goditje në portë). Nuk mjafton De Bryjne (dy asiste gjeniale) dhe nuk mjafton as Sterling dhe Aguero, protagonist i një përplasjeje të dhunshme me Guardiolën në momentin e zëvendësimit me Zhezus (minuta e 66-të): argjentinasi thërritet t'i lërë vendin Gabriel Zhezusit, por ai nuk e pret mirë zëvendësimin dhe i shkon drejt trajnerit të tij për të protestuar. I surprizuar, trajneri e ngre më
fort zërin dhe e shtyn. Debati vijon edhe me lojtarin nga stoli. Zgjat saktësisht 44 sekonda dhe shuhet pas ndërhyrjes së zëvendëstrajnerit Mikel Arteta. Siti nuk koleksionon tri pikët edhe për shkak se Lamela dhe Lukas Moura ekuilibrojnë sa herë
ata kalojnë në avantazh. Fillimisht vendësit festojnë me Sterlingun me kokë pas asistit gjenial të De Bryjnes në 20'. Tre minuta dhe Lamela ekuilibron pas asistit të Ndombelesë. 12 minuta më vonë De Bryjne gjen Agueron një metër larg vijës fatale dhe
rinis festa, e cila shuhet në pjesën e dytë, pasi Moura pas vetëm 19 sekondash në fushë, baraspeshon sërish. Finale elektrizuese me VARin përsëri protagonist, ashtu si në Champions, duke anuluar golin vendimtar të Zhezusit. Është minuta e 93-të:
goditja e këndit devijohet nga krahu i Laportes përpara se të mbërrijë në këmbët e brazilianit. Askush nuk e shikon përveç VAR-it. Siti nis festën, Guardiola thërret Agueron dhe bëjnë paqe duke e mbyllur gjithçka me një përqafim, por buzëqeshja i
ngrin në mes. VAR-i dënon përsëri Sitin, stopim që i jep mundësi Liverpulit dhe Arsenalit të kryesojnë të vetme me pikë të plota. Të hënën mund t'u bashkohet edhe Mançester Junajtid, ndërsa Siti dhe Totenhemi ngjiten në kuotën e 4 pikëve.