“Barut i lagur”, Milani në hall para kampionatit
Ende pa gola, "Djalli" s'shkon përtej barazimit me Çezenën
Duhej të ishte prova gjenerale për Mila nin që të dielën e ardhshme debuton në kampionat në transfertë kundër Udineze, por kuqezinjtë nuk bindën ndaj Çezenës. Edhe pse i përkasin Kategorisë së Tretë të futbollit italian, ekipi romanjol i krijoi shumë vështirësi "Djallit". Në pjesën e parë ekipi i Xhampaolos i qëndroi besnik formacionit të daljeve të fundit, me Bilian në regji e Suson si fantazist pas dyshes Kastijeho-Piontek. Nisje e dobët e sfidës për kuqezinjtë që vuajtën rreshtimin e ngjeshur në mbrojtje të rivalëve. Madje është Çezena që në minutën e 14-të i fut të dridhurat Donarumës kur Kapelini kroson në zonë për Saraon, i cili nga fare pranë gabon në shënjestër. Reagimet e vetme kuqezi vijnë me Suson nga goditje dënimi, teksa në minutat e para Piontek nuk merr asnjë pasim të shfrytëzueshëm. Sfidë e ndierë për të dyja ekipet, me tensionin që arrin nivele të tepruara për një miqësore në minutën e 24-t kur Valeri ndërhyn ashpër ndaj Kalabrias. Bardhezinjtë ruajnë fushën e tyre dhe Milani nuk gjen për asnjë moment vertikalizimin e duhur. Për të parë një rast të rrezikshëm
me aksion duhet fundi i pjesës së parë kur Muzakio niset në driblim nga prapavija, shkëmben me Kalabrian dhe kroson në zonë, por as Kastijeho e as Piontek nuk janë në pozicione për të lënë gjurmë në rezultat. Me kuqezinjtë që tentojnë me Bilian mbyllet fraksioni i
parë i lojës, që mbase nuk ishte krejtësisht "memec", por me siguri që nuk foli "milanisht".
"AGJËRIM" - Edhe pjesa e dytë në "Manuci" nuk sjell ndryshime, të paktën në aspektin e lojës. Xhampaolo kalon Çalhanoglunë në regji me Bilian që del për t'i bërë vend Paketas. Kuqezinjtë
rrisin ritmin, por topat në zonën rivale janë me pikatore. Çalhangolu provon në dy raste, por goditjet e tij nuk vendosin në vështirësi Aliardin. Suso heq dorë nga konkluzionet dhe mundohet të shërbejë Piontek, por polaku paraprihet rregullisht nga mbrojtësit rivalë. Xhampaolo vijon me zëvendësimet duke futur Kesin dhe Andre Silvën, e po ashtu i jep mundësinë e debutimit Duartes, por Milani nuk krijon problem për Çezenën. Duhen dy gabime nga prapavija e Çezenës për të parë Milanin të rrezikshëm. Në të dyja rastet, Kastijeho dhe Andre Silva vonojnë në goditje. As hyrja e Maldinit nuk e ndryshon rezultatin, teksa arbitri D'Askanio nuk pret as përfundimin e 90 minutave për të sinjalizuar fundin e takimit. Çezena i gëzohet barazimit në miqësore, ndërsa Milani del nga fusha me shumë mësime dhe ende pa gola...