Tri klube në festë, ja si ndryshon kampionati pa Kamzën
Korçarët kualifikohen në gjysmëfinale pa luajtur fare
Vendimi për përjas htimin e Kamzës nga Kategoria Superiore ka hapur skenarë të rinj për kampionatin. Në bazë të rregullores së FSHF-së, duke qenë se deri në këtë pikë të sezonit janë luajtur më shumë se 50+1% e ndeshjeve, atëherë deri në fund të gjitha ekipet që në kalendar duhet të përballeshin me Kamzën, i fitojnë në tavolinë 3-0. Kampionatit i mbeten edhe 12 javë, ndërkohë që Kamza ishte kualifikuar edhe në turin çerekfinal të Kupës së Shqipërisë. Nga ky kompeticion tashmë kalon automatikisht pa luajtur fare në turin gjysmëfinal klubi i Skënderbeut, që duhet të zhvillonte më 13 mars ndeshjen e parë me Kamzën, të vlefshme për çerekfinalet. Korçarët janë praktikisht më të fituarit nga historia fatkeqe e Kamzës. Nga ndeshjet e mbetura të fazës së tretë, Skënderbeu duhet të luante për javën e 27-të në shtëpi ndaj Kamzës, ndërsa edhe sezonin e mbyllte ndaj të njëjtit ekipi në javën e 36-të. Kësisoj, përveç kualifikimit në Kupë, merr automatikisht edhe gjashtë pikë në tavolinë në kampionat. Kjo i jep skuadrës një dorë të madhe për të pretenduar deri në fund një vend në Kupat e Europës, paçka se ka zero shanse për momentin, duke qenë se Skënderbeu është përjashtuar nga UEFA (pritet vendimi i KAS). Të përfituar të mëdhenj nga dënimi i Kamzës janë pa diskutim edhe Luftëtari e Flamurtari. Skuadra gjirokastrite lufton për mbijetesë dhe ashtu si Skënderbeu, do të marrë gjashtë pikë në tavolinë ndaj Kamzës, duke i dhënë kështu një qetësi në garën me Kastriotin. E njëjta gjë edhe me vlonjatët, që kanë 6 pikë të sigurta, pasi kalendari u ka buzëqeshur dhe mund të përfitojnë për të parë më lart në renditje. Në fazën e katërt situata është më e qartë për faktin se të nënta skuadrat e mbetura në garë do të marrin secila fitoret në tavolinë dhe në këto kushte askush nuk mund të quhet më i favorizuar se tjetri. Në dy fazat e para Kamza iu mori nga tri pikë ekipeve si Tirana, Kastrioti, Luftëtari dhe Skënderbeu, ndërsa barazoi dy herë kundër Laçit dhe nga një herë ndaj Teutës, Tiranës dhe Flamurtarit.
Laçi, 1-1 në fuqi
Ndeshja ku u regjistrua dhuna barbare ndaj gjyqtarit Eldorian Hamiti nuk preket sa i përket rezultatit që prodhoi fusha. Vendimi i djeshëm i Komisionit të Disiplinës konfirmoi se Kamza-Laçi 1-1 mbeti në fuqi, pasi ndeshja u mbyll normalisht pas 97 minutave të luajtura. Duke qenë se incidenti ndodhi vetëm pas vërshëllimës së arbitrit, në këto kushte anëtarët e Disiplinës nuk e kanë interpretuar si ndikim direkt në rezultat, duke mos i dhënë fitoren në tavolinë klubit mik, Laçit.