Brazili për hakmarrje në Berlin, me kujtimin e 7-1
Miqësorja, “Seleçao” kërkon t’u kthejë reston gjermanëve
Nuk kanë festuar ende si duhet fi toren 3-0 ndaj Rusisë, por në Brazil flitet vetëm për testin e radhës të "Seleçao"- s së Tites, ai i së martës 27 mars në Berlin, kundër Gjermanisë. Arsyeja: asnjë brazilian nuk mund ta harrojë atë që ndodhi në gjysmëfinalen e Botërorit të 2014-ës. Disfata 1-7 në Belo Horizonte u shndërrua në turpin më të madh kombëtar, në tragjedinë futbollistike që kurrë nuk do mund të fshihet nga kujtesa, aq sa në Brazil shprehja "Çdo ditë ka një 7-1" (së bashku me "Maracanazo", që rrjedh nga emri i stadiumit "Maracana" ku në 1950- ën përfaqësuesja braziliane humbi finalen ndaj Uruguait) është kthyer në sinonim të katastrofave politike e sociale.
Ndaj flitet vetëm për ndeshjen e Berlinit, ku nuk do të marrin pjesë nga gjermanët, Tomas Myler e Mesut Ozil: të përdorur mbrëmjen e ditës së premte në miqësoren ndaj Spanjës, trajneri Lëv ka vendosur t'i lërë jashtë angazhimit të radhës pasi "kanë nevojë të rifitojnë fuqitë: sezoni është i gjatë dhe stresues, do më duhen në qershor". Nga Brazili, në krahun tjetër, do mungojë, si pasojë e dëmtimit, Nejmar, pikërisht si në vitin 2014 në impiantin "Mineirao": Tite e ka cilësuar si të vetmin e pazëvendësueshëm të skuadrës së tij (por trajneri ka mbetur i kënaqur, pas sfidës ndaj formacionit rus, nga Duglas Kosta).
Pikërisht Myler, që në Belo Horizonte shënoi dy gola, ka thënë mendimin e tij: "Brazili është një vend i çmendur për futbollin dhe mund t'i imagjinoj pasojat që ka pasur ai rezultat. Por, mbi kundërshtarët tanë pati shumë presion dhe ajo ndeshje është një kujtim që, mendoj, të humburit do e kenë përgjithmonë. Nuk do flisja për hakmarrje, e megjithatë për ne ajo ndeshje ishte mbi të gjitha një etapë për t'u afruar me objektivin parësor: ndaj, sfida që nuk do fshijmë kurrë nga memoria është finalja e fituar (ndër të tjera) kundër Argjentinës (1-0, gol i Mario Gëces)". Kundër Brazilit do jetë Toni Kros, që në "Mineirao" shënoi po ashtu dy gola. Dhe mesfushori ka parashikuar një tjetër rrjedhë krahasuar me 2014- ën: "'Seleçao' e sotme është më e fortë se ajo e Botërorit të fundit". Gjithçka, përfshi spektaklin, mbetet për t'u parë...