Regbi Tirana në Ballkaniadë, ftesë për ndihmë financiare

Klubi i Regbisë Tirana, skuadra e parë e këtij lloji në Shqipëri vazhdon stërvitjen e saj mes sakrificave për të përfaqësuar denjësisht Shqipërinë dhe sivjet do të marrë pjesë edhe në Kupën Ballkanike 2018. Do të duelojnë me 15 skuadra nga 7 shtete të ndryshme të rajonit, ku ata do të jenë protagonistë të Grupit C, së bashku me grekët e Atika Rinos dhe serbët e Radnicki Nish të Serbisë. Aventura e tyre në këtë turne nis pikërisht kundrejt këtyre të fundit, më 14 prill, në transfertë, por ndërkohë, klubi bën apel për ndihmën e një sponsorizimi, duke qenë se qoftë edhe udhëtimi ka kosto, por në të njëjtën kohë edhe për gjetjen e një ambienti për të zhvilluar ndeshjet në shtëpi, me anë të një apeli në faqen e tyre në "Facebook". "Regbi Tirana është i pari ekip regbie në Shqipëri, ndaj e ndjejmë si detyrim moral që të ndajmë disa probleme me opinionin publik. Jemi i vetmi ekip që përfaqësojmë Shqipërinë dhe sivjet do të marrim pjesë edhe në Kupën Ballkanike 2018, një arritje madhore për ne, në historinë 4-vjeçare si klub. Por pjesëmarrja sjell edhe probleme të mëdha: ato të natyrës ekonomike, pasi në debutim, drejt Nishit të Serbisë, rruga është 1000 kilometra vajtje-ardhje dhe transfertat kanë kosto të lartë. Por edhe sfidat që na duhet të luajmë në shtëpi janë një problem i madh, pasi kostot për të siguruar një fushë, ku mund të organizojmë ndeshjet janë gjithashtu të ekzagjeruara. Prandaj, shpresojmë në një mbështetje qoftë edhe morale nga ana juaj për të vazhduar punën tonë dhe për të përfaqësuar denjësisht kryeqytetin dhe Shqipërinë në këtë turne", ishte deklarata e "Regbi Tirana".