"Dënojmë me forcë sulmin, klubet duhet të marrin masa"
FSHF-ja ka reaguar nëpërmjet një deklarate zyrtare pas sulmit ndaj trajnerit të paratërinjve të Tiranës, Migen Memellit. "Qeveria" e futbollit shqiptar dënon me forcë dhunën e përsëritur në futboll, ndërsa paralajmëron të rrisin vigjilencën e të marrin masa që të tilla ngjarje të parandalohen. Federata e cilëson këtë ngjarje që ndodh në mesin e fushës së stërvitjeve jo vetëm të shëmtuar, por edhe shembull të keq për edukimin e fëmijëve. REAGIMI I FEDERATËS
"FSHF-ja, duke marrë shkas nga ngjarja e sotme (djeshme) e sulmit karshi trajnerit të ekipit të moshës U-17 të KF Tirana, Migen Memellit, një fenomen ky, fatkeqësisht i përsëritur pas rastit të teknikut Gjoka në Shkodër, sërish ngre zërin dhe dënon me forcë një veprim të tillë, tërësisht aspak 'fair' dhe maksimalisht të papranueshëm për familjen tonë të futbollit. Të tilla ngjarje që po përsëriten, për fatin e keq, në fushat stërvitore, duhet të shërbejnë për të rritur në maksimum sensibilizimin dhe ndërgjegjësimin qytetar dhe atë sportiv. Asnjë rrethanë nuk legjitimon kurrsesi kalimin në ekstrem dhe ndërmarrjen e veprimeve agresive karshi njerëzve që punojnë çdo ditë dhe angazhohen shpirtërisht me futbollin. Për më tej, ky është një shembull po kaq i keq edhe për fëmijët, që po ndërtojnë karrierën e tyre. FSHF-ja, si edhe në rastin e agresionit karshi trajnerit të Vllaznisë Gjoka, edhe në këtë rast me trajnerin Memelli e ndëshkon me forcë këtë rast të shëmtuar dhe inkurajon trajnerin Memelli dhe të gjithë teknikët e tjerë të vazhdojnë të ushtrojnë misionin e tyre, trajnimin në futboll. Nga ana tjetër, klubet respektive duhet të rrisin në nivele të larta vigjilencën dhe masat e tyre paraprake që të parandalojnë të tilla fenomene që nuk i shërbejnë aspak lojës dhe familjes sonë. Fatmirësisht, edhe ky incident nuk kishte komplikacione shëndetësore, por shërben për t'u dhënë fund një herë e përgjithmonë të tilla fenomeneve dhe për të ndërgjegjësuar të gjithë në respektimin e punës së trajnerit, duke dënuar çdo humbje kontrolli apo agresion të shëmtuar", shkruhej ndër të tjera në reagimin e bërë prej "qeverisë" së futbollit shqiptar.