Pepe Reina kryen vizitat me Milanin
Portieri testohet në klinikë sekrete nga mjekë që s'kanë lidhje me klubin
Vizita e Napolit në Milano me sa duket nuk ka qenë vetëm për çështje kampionati. Sipas agjencisë "ANSA", portieri i të kaltërve ka kryer dje vizitat mjekësore me Milanin në kuadër të akordit dyvjeçar që mund ta lidhë me kuqezinjtë në fund të sezonit aktual. Gardianit spanjoll i përfundon kontrata më 30 qershor, ndaj ai tashmë është i lirë të arrijë marrëveshje me këdo klub që të dëshirojë. 35-vjeçari thuhet të ketë kryer vizitat në një qendër të specializuar larg syve të gazetarëve, duke preferuar një lokacion tjetër ndryshe nga ai që kanë përdorur zakonisht në klubin kuqezi. Përveç qendrës edhe stafi i mjekëve, në vizitat e Reinës ka qenë i ndryshëm. Nga ana e klubit kuqezi mungojnë deklaratat zyrtare apo konfirmimet nën zë, por siç paralajmëroi një javë më parë drejtori sportiv Mirabeli, klubi kuqezi i ka kërkuar Napolit leje për të biseduar me menaxherin e futbollistit dhe "për të parë nëse ekzistojnë kushtet për një akord". Me aq sa është përfolur javët e fundit, Milani ka arritur një marrëveshje paraprake me lojtarin, i cili pas veshjes kuqezi do të përfitojë 2.53 milionë euro në sezon për dy vite me opsionin për ta zgjatur bashkëpunimin edhe me një vit tjetër. Muajt në vijim e sidomos merkato do të përcaktojnë pozicionin e Reinës në ekipin e Gatuzos. Spanjolli mund të emërohet portier i parë nëse largohet Donaruma, ndërsa nëse 19-vjeçari qëndron në bazë, atëherë Reina mund të bëjë pa problem zëvendësuesin. Ish-liverpulasi është në fund të karrierës dhe pretendimet e tij nuk janë në aspektin teknik më shumë se në atë ekonomik me Milanin, që mund të jetë etapa e fundit e rëndësishme e karrierë së tij.