Presidenti me armë në fushë, Greqia pezullon kampionatin

Çështja PAOK/ Qeveria ndal turneun pas terrorit

Qeveria greke ka vendosur ditën e djeshme të pezullojë kampionatin me kohë të pacaktuar, pas bastisjes me armë në fushë të presidentit të PAOK-ut të Selanikut, Ivan Savidis, gjatë ndeshjes kundër AEK-ut të Athinës, që u ndërpre. "Kemi vendosur të ndalim kampionatin", deklaroi sekretari i sportit, Giorgos Vasiliadis, pas mbledhjes së emergjencës së qeverisë së Aleksis Tsipras. Ndeshjet nuk do të rinisin deri kur të kemi në dorë një kuadër të plotë të situatës dhe të gjithë të biem dakord", vijoi Vasiliadis, duke shtuar se Athina është "në kontakte të vazhdueshme me UEFA-n". "GREXIT" - "Për më shumë se 3 vite - ka vijuar ai, - qeveria greke ndodhet në një betejë për të normalizuar situatën në kampionatin grek dhe në përgjithësi në sektorin e futbollit. Për arritjet që kemi bërë, duke marrë përsipër edhe koston politike, nuk do të lejojmë fenomene të tilla të së kaluarës, që na kthejnë

pas". Sipas tij, do të ketë kontakte edhe me aktorë të të gjithë ekipeve, por edhe të UEFA-s, e kampionati nuk do të fillojë nëse nuk arrihet në një marrëveshje të rakorduar nga të gjithë, duke mos përjashtuar edhe një "Grexit" për futbollin grek, e thënë ndryshe mospjesëmarrje në kupat e Europës.

TERRORI - Imazhet e ngjarjesterror në "Toumba Stadium" në mbrëmjen e së dielës kanë bërë xhiron e botës: presidenti i PAOKut, Savidis, zbriti në fushë me pistoletë në brez pas anulimit të një goli në dëm të skuadrës së tij për pozicion jashtë loje në sfidën ndaj skuadrës së Athinës, kur rezultati ishte 0-0. Oligarku ruso-grek, 58 vjeç me origjinë greke, ndërhyri në fushën e blertë në minutën e 89-të me në krah disa truproje që iu drejtuan me kërcënim arbitrit Georgios Kaminis dhe u kërkoi futbollistëve të tij të braktisnin menjëherë terrenin e lojës, teksa forcat e rendit sollën me vështirësi situatën në normalitet. Ndeshja ishte ndalur: ngjarja solli indinjatën e 26 mijë tifozëve të pranishëm në impiantin e Selanikut. Por, ndërsa zemërimi i tyre nuk shkoi më tej se disa brohoritje dhe vërshëllima, Ivan Savidis ka tejkaluar çdo kufi. Flitet se për Savidis, i nxjerrë me dhunë nga fusha e blertë ( dhe dukshëm i tensionuar) kërkohet nga policia pas lëshimit të një urdhërarresti së bashku me katër personat e tjerë (supozohet, truprojat). SUPER LIGA - Kampionati grek ka mbërritur në javën e 25-të dhe sheh në krye AEK-un me dy pikë avantazh ndaj Olimpiakosit (kampion në fuqi dhe fitues i shtatë titujve të fundit kombëtarë) dhe pesë mbi PAOK-un: Super Liga, megjithatë, nuk i ka risi episodet e dhunës, që përgjithësisht, megjithatë, kishin parë si protagonistë në të kaluarën grupet e ultrasve: përfshirja e pronarit të klubit ka shtyrë qeverinë greke të ndalë gjithçka.