Partizani prezanton Telushin
Ish-kapiteni i Flamurtarit pritet të stabilizojë qendrën e mesfushës, priten goditje të tjera
Bruno Telushi është përforcimi i parë i Partizanit në merkaton e dimrit, ndonëse ky proces nuk është hapur zyrtarisht. Ishkapiteni i Flamurtarit të martën ka dalë në stërvitje me "demat", por nuk ka vonuar edhe prezantimi i mesfushorit nga ana e klubit. Me Telushin, Partizani ka nisur zyrtarisht revolucionin që klubi do t'i nënshtrohet në merkaton e janarit. Me prezantimin e vlonjatit ia ka bërë "sefte" edhe drejtori i ri i përgjithshëm i "demave", Olsi Rama. Ish-kapiteni i Flamurtarit është vetëm pikënisja e një merkato të fuqishme që kryeqytetasit pritet të kryejnë në këtë periudhë. Para konferencës së djeshme për mediat të trajnerit Sulejman Starova, klubi ka prezantuar për veten, jo për mediat, përforcimin e parë të merkatos. Në këtë prezantim nuk ka qenë asnjë media e pranishme, praktikë që Partizani e ka përdorur shpesh në merkatot e fundit. Gjithçka është bërë e ditur për mediat dhe publikun me një njoftim të shpërndarë nga klubi përmes faqes zyrtare në "Facebook": "Klubi njofton se ka arritur marrëveshjen me Bruno Telushin. Mesfushori 27-vjeçar, pas eksperiencës në Kroaci me ekipin e Slaven Belupo, ka nënshkruar me 15 herë kampionët e vendit një kontratë për 2 vite e gjysmë. Pas firmës së hedhur në kontratë, Telushi është prezantuar në ambientet e klubit nga drejtori i përgjithshëm, Olsi Rama". Marrëveshja e firmosur mes palëve dhe e publikuar nga klubi përshkruan vetëm kohëzgjatjen e bashkëpunimit pa detaje financiare. Gjithsesi, flitet se vlonjati do të përfitojë 5 mijë euro rrogë mujore. Telushi do të jetë i gatshëm të luajë vetëm në janar për Partizanin, kështu që, këtë periudhë ai do ta shfrytëzojë për stërvitje dhe për t'u harmonizuar me grupin e ri. Prezantimi i djeshëm nga klubi presupozon që lojtari nuk ka probleme dokumentacioni dhe aventura e tij e shkurtër te Slaven Belupo konsiderohet e mbyllur përfundimisht.