Kashami bën bilancin: Dolëm nga kriza, Apolonia nuk ndalet më
Trajneri analizon suksesin në sfidën e Kuçovës
Apolonia është rikthyer bindshëm në kampionat. Fierakët kanë fituar në transfertën e radhës ndaj Naftëtarit. Kanë mjaftuar dy gola, nga një në secilën pjesë të lojës me anë të Mihanës dhe Hysenshahajt, që ata të hipotekojnë fitoren e dytë në këto katër javë të kampionatit të zhvilluara dhe ngjiten në vendin e tretë në tabelën e klasifikimit me 7 pikët e grumbulluara. Në këtë sfidë, të besuarit e trajnerit Ndriçim Kashami kanë zhvilluar një lojë të kujdesshme në të gjitha repartet me një futboll të qetë e racional dhe me theks sulmues. Ata kanë pasur epërsi dhe e kanë dominuar takimin në pjesën më të madhe të tij, ku përveç golave të shënuar kanë krijuar dhe shumë raste të tjera, por pa mundur t'i finalizojnë. Pas pushimit të së dielës, Apolonia sot do t'u rikthehet përgatitjeve për ndeshjen e radhës që do të luajë në shtëpi me Shkumbinin.
Kashami - Trajneri kavajas i fierakëve, Kashami, në një prononcim për "Panorama Sport" u shpreh: "Ishte një fitore që erdhi pikërisht në kohën e duhur. E kishim përgatitur këtë ndeshje gjatë dy javëve që kishim në dispozicion me kujdesin e duhur në të gjitha aspektet dhe duke e vlerësuar kundërshtarin, pavarësisht pozicionit të tij në tabelën e renditjes. Kryem disa zëvendësime në formacionin bazë duke aktivizuar sulmuesin e ri Mihana që shënoi golin e parë të avantazhit, si dhe mbrojtësin Duda që e justifikuan besimin tonë. Gjithsesi, lojtarët tanë zhvilluan një lojë të kujdesshme në të gjitha aspektet kishin besim në vete te arritja e fitores. Zbatuan mirë detyrat e ngarkuara jo vetëm në mbrojtje ku luajtën me siguri e saktësi duke vlerësuar çdo moment të lojës, por ishin gjakftohtë në situatat e krijuara. Transfertën me Naftëtarin e lamë pas dhe duke mos pasur kohë për t'iu gëzuar fitores së arritur, pasi na duhet të qëndrojmë me këmbë në tokë, kemi filluar të mendojmë për ndeshjen e radhës që do ta luajmë në fushën tonë me Shkumbinin, ku do të kërkojmë vazhdimësinë pozitive, edhe pse jemi të ndërgjegjshëm se do të jetë një ndeshje e vështirë dhe me luftë të fortë sportive", përfundoi Kashami. Mikel Mbriçaj