Besa-Erzeni, trajnerët sherr në tunel
Kavajasit i afrohen kreut, shijakasit nuk rezistojnë
Java e 4-t e Kategorisë së Parë është mbyllur me një përballje spektakolare. Besa dhe Erzeni kanë dhuruar një sfidë shumë interesante dje në Kavajë. Besa ka fituar 3-1 ndaj shijakasve duke përmbysur disavantazhin e shpejtë. Një lojë e fortë, gabime, kartonë, tension në pushim të ndeshjes...
Java e 4-t e Kategorisë së Parë është mbyllur me një përballje spektakolare. Besa dhe Erzeni kanë dhuruar një sfidë shumë interesante dje në Kavajë. Besa ka fituar 3- 1 ndaj shijakasve duke përmbysur disavantazhin e shpejtë. Një lojë e fortë, gabime, kartonë, tension në pushim të ndeshjes dhe gola të shumtë. Madje, në pushim të takimit në tunel ka pasur përplasje fizike mes trajnerëve, Sinellës së Besës dhe Bubeqit të Erzenit. Madje, mësohet se ka pasur edhe ngritje duarsh nga tekniku i skuadrës vendëse. Dhe me startin e pjesës së dytë, gjyqtari kryesor e ka dërguar Sinellën në tribunë duke i shpjeguar se arsyeja ishte zënka me homologun e tij në tunel. Paksa e çuditshme një sherr i tillë duke ditur që të dy trajnerët janë kavajas.
NDESHJA - Trajneri Bledar Sinella hodhi në fushë një formacion me ndryshime ku binte në sy aktivizimi i portierit Rexhepaj në vend të Kaloshit. Miqtë zbritën në fushë gjithashtu me formacion më të mirë. Që në minutat e para vihet re luftë e fortë dhe dëshirë për të shënuar nga të dy ekipet. Besa e para me Isufin fal një gol të
sigurt në minutën e 11-të kur sulmuesi përballë portës nuk shënon po ngatërrohet, duke humbur një mundësi të artë. Për të ardhur në minutën e 15të, kur Kaja gabon në pasim dhe topi përfundon te Pasha që depërton në zonë, ndërsa mbrojtësi që gaboi ndërhyn në
mënyrë të parregullt duke shkaktuar penallti. Nga pika e bardhë godet Pasha dhe shënon, 0-1. Për gati tetë minuta, miqtë luajnë me 10 futbollistë, pasi Troplini merr ndihmën e parë dhe fashon kokën pas përplasjes me Perjen. Kavajasit do ta gjenin golin e
barazimit të ndihmuar nga patrioti i tyre, portieri mik Dajsinani që nuk zotëron dot një top të kthyer keq nga një lojtar mik dhe është Shabani që ndërhyn duke i rrëmbyer topin dhe shënon. Me të startuar pjesa e dytë, kavajasit kalojnë në avantazh me Mario Morinën
që shënon golin e parë me verdhezinjtë. Pas këtij goli është përsëri Besa që luan më mirë dhe kërkon golin e sigurisë. Aktivizimi i Edmond Hoxhës ka sjellë më shumë lëvizshmëri te krahu i majtë i Besës dhe shpesh ai bëhet protagonist i sulmeve e pasimeve. Është Besa që komandon në lojë me një dirigjent si Mehlid Mihani. Për të ardhur te goli i sigurisë, ku Ervis Kaja korrigjon gjithçka duke shfrytëzuar një pasim të Mihanit dhe me kokë e çon topin në trekëndëshin e mbrojtur nga Dajsinani. Nuk ka më gola dhe Besa fiton 3-1.