Evertoni turpëron Guardiolën
Pep prek fundin, regjistron humbjen më të thellë të karrierës në kampionat
Amund të thuhet që ishte një ditë që preku fundin për një skuadër që ka humbur një ndeshje, përveç të tjerash në transfertë, pasi kishte fituar 4 në 5 të fundit në kampionat? Po, nëse skuadra quhet Mançester Siti dhe drejtohet nga një trajner kampion dhe fitues si Pep Guardiola dhe ka në gjirin e saj plot kampionë, pavarësisht se renditet e 5ta, -10 pikë nga Çelsi kryesues dhe regjistroi humbjen e 5- të këtë kampionat. Dhe pjesa më e rëndë e kësaj situate është humbja me rezultatin e pabesueshëm 4- 0 në "Goodison Park" kundër Evertonit, në të cilën Siti, përveç zotërimit shterp të topit, markë e fabrikës guardiolane, konkretizoi pak. Goditi shumë rrallë drejt portës dhe nuk e vendosi kurrë në pozita gjuajtjeje Agueron. Ndërsa mbrojtja "futi ujë", mbi të gjitha nga anët e ish-it të ndeshjes, Xhon Stonsit, mbrojtësi më i kushtueshëm në historinë e futbollit, 56.5 milionë euro plus 4 milionë bonuset, transferuar gjatë merkatos së verës.
Zemra e Evertonit - Nga e gjitha kjo përfitoi Evertoni i Ronald Kumanit, i aftë për të thithur oksigjen gjatë gjithë ndeshjes, duke shënuar 4 herë në portën e kundërshtarit dhe mos pasur pikë mëshire edhe se po e poshtëronin atë. Në pjesën e parë, Lukaku devijoi në mënyrë fantastike një vertikalizim të të riut Dejvis, i pasuar nga krosimi i ëmbël i Miralasit. Ky i fundit la shenjën e tij në fillim të pjesës së dytë, pasi e ftoi Barklej. 10 minuta nga fundi, Dejvis finalizoi një aksion që e nisi vetë ai me një goditje me thembër, duke u çmarkuar nga dy kundërshtarë dhe i përpunuar nga Barklej, më në fund i papërmbajtshëm. Diagonalja fituese e Lukmenit, 21 vjeç dhe debutues në Premier Ligë, ishte perla që vulosi rezultatin e një Evertoni të ridizenjuar nga Kuman në skemën 3- 4- 2- 1, i cili mbuloi çdo zonë të fushës, duke u lënë miqve supremacinë territoriale, por sterile.