Guardiola shijon fitoren e parë, Tuheli nuk e thyen dot tabunë
Mançester Siti mposht me penallti Dortmundin
Ishte lloji i golit që është shndërruar në markën e skuadrave të Pep Guardiolës ndër vite dhe i pari prej të cilëve Mançester Siti uron që të ketë shumë me trajnerin spanjoll në stol. Kishin mbetur edhe 11 minuta nga ndeshja e parë dhe e vetme e Sitit në Kinë dhe ata sulmuan nga e majta. Pasimi ndau në dysh mbrojtjen e Dortmundit: Aleiks Garsia kombinoi me Silvën dhe ai ftoi Agueron të shënonte. Ishte një finalizim i thjeshtë, por fryt i një pune të shkëlqyer skuadre dhe ndoshta shkëndija e parë e efektit Pep te "qytetarët". Silva dhe Aguero kishin kombinuar për shumë gola të Sitit këto vite dhe ishte e pashmangshme që goli i parë i epokës Guardiola të mos mbante markën e tyre. Por spanjolli pa edhe njëherë defektet e skuadrës së tij kur në goditjen e fundit të ndeshjes Kristian Pulisiç barazoi për Dortmundin. Megjithatë, portieri i ri Angus Gan, i cili priti tre penallti dërgoi në delir stadiumin "Shenzhen Universiade", që ishte gjysmë i boshatisur. Gjermanët nuk arritën dot të mundnin edhe skuadrën e dytë të Mançesterit pasi shkatërruan 4- 1 Mançester Junajtin dhe Tomas Tuhel rikthehet nga Kina sërish pa mundur dot të fitojë duelin e parë ndaj Pep Guardiolës. Bilanci mes tyre pas 6 ndeshjeve është 5 fitore spanjolli dhe 1 barazim. Megjithatë Tuhel është i kënaqur nga kjo fazë përgatitore e deritanishme, sepse Osman Dembele, është fituesi i tij i vërtetë. "Ishte i shkëlqyer Dembele dhe ndeshja. Unë jam i kënaqur. Nuk është e lehtë të luash 3 ndeshje në 9 ditë", tha trajneri i Dortmundit.