Prezantohet Higuain: Në Torino për tripletën
"Del Piero idhulli im, me Dibalën formojnë një dyshe super"
Iemocionuar, në formë dhe pa komplekse kur flet. Gonzalo Higuain ka folur për të parën herë si futbollist i Juventusit gjatë konferencës së djeshme për shtyp. E kishte të pamundur të "driblonte" pyetjet mbi Napolin dhe presidentin Aurelio De Laurentis, teksa ka shpjeguar mënyrën si shkoi tratativa me bardhezinjtë.
Tifozët dhe Sarri - "Gjatë ditëve të fundit kam qëndruar në heshtje, por mund të them se te Napoli kam kaluar tre vite të mrekullueshëm. Nuk kam fjalë të tjera për të thënë, përveçse t'i falënderoj të gjithë për mbështetjen e madhe që më kanë dhënë. Kjo ka qenë një zgjedhje që e kam bërë për arsye personale dhe tani jam i përqendruar te Juventusi, tek e tashmja dhe e ardhmja. E kuptoj që tifozët e Napolit janë të zemëruar me mua, vendim për të cilin kam marrë shumë ofendime, por kjo ka qenë një zgjedhje që duhej ta bëja dhe jam i lumtur për këtë", ka thënë fillimisht argjentinasi. Më tej, ai u ndal te marrëdhënia me trajnerin Sarri dhe presidentin De Laurentis: "Ka qenë një zgjedhje e imja të mos flisja, të qëndroja në heshtje, të mos mendoja për atë që po ndodhte. Për Sarrin mund të them vetëm fjalë të mirë, më ka ndihmuar të përmirësohem.
Nëse është i zemëruar me mua që u largova pa e përshëndetur, i kërkoj falje. De Laurentis? Nuk kam pasur asnjë marrëdhënie me të, sepse filozofia e tij nuk ishte e imja. Nuk mund të them më shumë se kaq, vetëm se
zgjedhja ime ka ardhur edhe se më ka shtyrë ai ta bëj. Me të nuk kisha një raport të mirë dhe s'mund të qëndroja më asnjë minutë. Tani jam shumë i lumtur këtu dhe dua ta falënderoj klubin tim të ri për sforcimin e madh që ka
bërë për mua".
Tripleta - Lojtari më i shtrenjtë në historinë e klubit të Juventusit ka zbardhur edhe objektivat që ka me "Zonjën" në sezonin e ardhshëm: "E kam thënë edhe më parë, mendoj se kjo është zgjedhja më e
mirë për mua. Tani jam pjesë e një skuadre të madhe me një mentalitet fitues. Jam i përqendruar vetëm te Juventusi dhe ëndërroj tripletën me ekipin tim të ri", ka thënë Higuain, i cili do të përfitojë 7,5 milionë euro në sezon me bardhezinjtë për katër vitet e ardhshme.
Del Piero dhe Dibala - Argjentinasi ka zgjedhur fanellën me numër 9, por në fund ka zbuluar se idhulli i tij te Juventusi është Del Piero: "Kur isha në Madrid, Del Piero më pëlqente shumë si futbollist. I shikoja gjithmonë
ndeshjet e Juventusit, pasi ishte ai në fushë. Ndërsa për Dibalën mund të them vetëm se e kam mik, kemi folur së bashku dhe do të jetë bukur të luajmë të dy. Manxukiç? Nuk e kam problem konkurrencën, pasi kur isha te Reali luaja në të njëjtin pozicion me Raulin dhe Van Nistelroin. Toti foli për mercenar? Për të nuk mund të them gjë tjetër veçse është një futbollist i mrekullueshëm. Nuk dua të kundërpërgjigjem. Zgjedhja për t'iu bashkuar Juventusit ishte e imja dhe jam i lumtur".