Olsi Rama: Isha si person në dijeni për çështjen “Xibraka”, sqarova situatën
Dëshminë e parë në prokurori, vëllai i Edi Ramës e dha në fundin e qershorit. Kreu i SPAK e pranoi pak ditë më parë hetimin e dosjes
Olsi Rama, vëllai i Kryeministrit Edi Rama, është paraqitur ditën e djeshme për herë të dytë në Prokurorinë e Posaçme, ku bëhet me dije se objekt i thirrjes së tij është çështja e laboratorit të kokainës në fshatin Xibrakë të Elbasanit.
Laboratori në fakt u godit nga një hetim që kishte ardhur nga prokuroria gjermane, ndërkohë që emri i Olsi Ramës nuk doli në pah derisa Gazmend Bardhi, kreu i grupit të PD- së në Parlament hartoi një kallëzim, të cilin e depozitoi në SPAK. Objekt i këtij kallëzimi ishte pikërisht vëllai i shefit të qeverisë, që sipas Bardhit ishte i përfshirë në çështjen e bujshme të që lidhej me laboratorin që grumbullonte, përpunonte dhe trafikonte kokainë nga vendi jonë. Në një prononcim të shkurtër për mediat, Olsi Rama tha se është thirrur si person në dijeni për çështjen “Xibraka”. “Për çështjen ‘ Xibraka’ isha si person në dijeni, dhashë shpjegimet e mia. U pyeta për gjëra që dini dhe ju, sqarova situatën”, - deklaroi Olsi Rama. Vëllai i kryeministrit u paraqit për herë të parë në SPAK më datë 28 qershor, ku
u pyet për të njëjtën çështje. Kujtojmë se kallëzim ndaj tij është bërë nga kreu i Grupit Parlamentar Gazment Bardhi, i cili pretendon se vëllai i kryeministrit ka qenë i përfshirë në aktivitetin e paligjshëm.
REAGIMI PËR MEDIAT I RAMËS
“Ju thashë që do të vijë sa herë të kem nevojë. Besoj se kjo ishte, sqarova, bëra detyrën time si qytetar për organet e drejtësisë.”
Po për çështjen Xibraka, po do doja të më pyesnin më shumë për ‘ Partizanin’ ( klubin sportiv) që dje filloi sezonin. Për këtë çështje nuk kam çfarë t’ju them më shumë se nuk kam informacione. Do
vij kur të më kërkojnë. Dhashë shpjegimet e mia si person në dijeni. Shpjegimet e mia i kanë personat të cilëve u intereson. Për ato gjëra që keni dëgjuar dhe keni pyetur juve, sqarova situatën. S’ka asgjë më tepër për të shtuar”, - tha ai për gazetarët. Në maj 2024, SPAK ka rihapur hetimet për dosjen “Xibraka” dhe madje edhe në një takim me gazetarët Altin Dumani, kreu i kësaj prokuroria pranoi se po vijojnë hetimet për atë çështje. Hera e fundit kur Olsi Rama është paraqitur në zyrat e SPAK ishte më 28 qershor 2024, ku mohoi që të jetë i përfshirë në çështjen ‘ Xibraka’. Po në maj të këtij viti vëllai i kryeministrit bëri me dije se depozitoi një padi në SPAK ndaj deputetit të opozitës, Gazment Bardhi, lidhur me kallëzimin e këtij të fundit se ai ka lidhje me laboratorin e drogës të zbuluar në Xibrakë në vitin 2015. Në kallëzim e Olsi Ramës, thuhet se ai i referohet një deklarate të Bardhit bërë publike për median ‘ online’ lidhur me të. Sipas tij, deklarimet e Bardhit përbëjnë elementë të veprës penale “Kallëzim të rremë”, ndërkohë që në lidhje me laboratorin e kokainës në Xibrakë ende sot e asaj dite ka persona të paarrestuar, ndonëse aso kohe policia ua përmendi emrin si të kërkuar, madje edhe ndërkombëtarisht.