Meta: Më 14 maj do mbyllim kapitullin e pushtetit monist dhe arrogant
Kreu i Partisë së Lirisë, Ilir Meta, prezantoi dje kandidatin e Primareve në Kurbin, Behar Haxhia. Në një postim të bërë në "Facebook", Meta shprehet se Bashkia e Kurbinit do të shkojë drejt fitores me në krye kandidatin Haxhia. "Kënaqësi të merrja pjesë në takimin e kryesisë të Kurbinit me kandidatin tonë të Opozitës të Bashkuar, z. Behar Haxhia, për kryebashkiak në 14 maj. Së bashku me drejtuesit e Partisë të Lirisë dhe deputetin e nderuar të Kurbinit, z. Kastriot Piroli shprehëm bindjen në fitoren historike të 14 majit, të cilën të gjithë kurbinasit po e presin me padurim për t'u ndarë përgjithmonë nga monizmi dhe arroganca e një pakice uzurpatorësh. I falënderova demokratët e Kurbinit për përzgjedhjen e shkëlqyer, që kanë bërë gjatë primareve, me z. Behar Haxhia, si kryebashkiak i ardhshëm. Jam i bindur se z. Behar Haxhia do të sjellë modelin e bashkëpunimit me të gjithë qytetarët kurbinas. Partia e Lirisë drejt një rezultati historik në 14 maj do të garantojë llogaridhënien dhe transparencën ndaj qytetarëve. Kënaqësi që listën e këshilltarëve tanë do ta drej
tojnë z. Dedë Ndreca dhe znj. Sabaete Hidri", deklaroi Ilir Meta. Po dje, kreu i Partisë së Lirisë deklaroi se zgjedhjet e 14 majit "do të jenë historike, sepse do të mbyllin përfundimisht kapitullin e pushtetit monist dhe arrogant". Meta, në një postim në rrjetet sociale, shkëputur nga intervista e dhënë në "Panorama TV", akuzon qeverisjen e Kryeministrit Edi Rama se "vetëm abuzon dhe shpërdoron". "Zgjedhjet e 14 majit do të jenë historike, sepse do të mbyllin përfundimisht kapitullin e pushtetit monist dhe arrogant, që nuk jep llogari, por vetëm abuzon dhe shpërdoron. Do të jenë historike sepse do të rikthejnë demokracinë dhe rolin e qytetarëve në vendimmarrje dhe sidomos do të rikthejnë shpresën te të rinjtë dhe të rejat e Shqipërisë", shkruan Meta. Kreu i Partisë së Lirisë deklaroi para gazetarëve se opozita është e bashkuar drejt ndryshimit. Këto deklarata, kreu i PL i bëri pas një vizite në selinë blu, për të cilën nuk dha detaje. I pyetur nga gazetarët për një koalicion ai deklaroi se shumica e kandidatëve të Këshillave Bashkiakë do të jenë nga opozita e bashkuar. Në të njëjtën kohë, Meta shtoi se kandidatët e primareve janë të mrekullueshëm. "Për ndryshim, për të çrrënjosur monizmin nga pushteti vendor dhe për të rikthyer llogaridhënien. Të gjithë opozitarët janë bashkë për ndryshim, kaq. Kandidatët e primareve janë të mrekullueshëm, të jashtëzakonshëm nga Tropoja deri në Sarandë dhe ne i konsiderojmë edhe kandidatë të Partisë së Lirisë. Shumica dërrmuese e gjithë këshillave bashkiake do të jenë të opozitës së bashkuar", u shpreh Meta. Pavarësisht deklaratave për unifikim të opozitës, ende nuk ka një koalicion zyrtar mes palëve. Nga ana tjetër, PL ka publikuar emrat për kandidatë në Këshillin Bashkiak të Tiranës, ku bie në sy se asnjë nga të propozuarit nuk është pjesë nga partia e aleatit të tij, Sali Berisha.