Vrau motrat për xhelozi, kërkohet burg përjetë
“Shkoja me të dyja. 20 vjet lidhje jashtëmartesore”, çfarë deklaronte Përparim Ademi para hetuesve, pasi i ekzekutoi me kallashnikov
Prokuroria e Tiranës ka mbyllur hetimet dhe ka depozituar në gjykatë dosjen për vrasësin e dy motrave në zonën e Astirit në Tiranë më shumë se një vit më parë.
Në pretencën e dhënë për Përparim Ademin, Prokuroria kërkon burgim të përjetshëm për të, duke e akuzuar për “Vrasje për shkak të marrëdhënieve familjare”. VRASJA E DYFISHTË
Krimi i rëndë tronditi kryeqytetin paraditen e 31 dhjetorit të vitit 2020, kur u vranë me armë zjarri motrat Kristina Bardhi dhe Zhaneta Metani, të cilat jetonin në një apartament të përbashkët, ndërsa autor i krimit të rëndë ishte 59vjeçari nga Maqedonia e Veriut, i cili ishte i martuar në vendin e tij. Ishte ora 10:06 minuta e mëngjesit kur Përparim Ademi shfaqet në afërsi të pallatit ku jetonin viktimat. I veshur me xhup ngjyrë blu dhe me pantallona të zeza, nga kamerat e sigurisë, ai ecën i qetë duke shkuar me biçikletë në vendin ku më pas do të kryente krimin e
rëndë. Me të, ishte dhe një djalë i ri, që sipas informacioneve, rezultonte të ishte nipi. Kur ka mbërritur përpara derës së banesës ku jetonin Zhaneta Metani dhe Kristina Bardhi, Përparim Ademi është përballur me dy motrat. Në këtë moment, pa u futur ende brenda apartamentit, 59-vjeçari ka shkrepur kallashnikovin, e vërtetuar edhe nga shenjat e plumbave në derën kryesore të apartamentit. Pasi ka hyrë në brendësi, Përparim Ademi qëlloi me breshëri
kallashnikovi dy motrat, duke iu shkaktuar vdekjen e menjëhershme. Rreth 13 minuta më vonë, ai largohet nga e njëjta rrugë. Ai përshkon të njëjtin itinerar, por kësaj radhe pa biçikletë. Rreth 1 orë më vonë, ai u arrestua nga Policia pranë shkollës “Vasil Shanto”.
KARREMI
Përparim Ademi ka përdorur si karrem fëmijën e njërës prej motrave për të hyrë në banesën e tyre, të cilat me sa duket e kanë kuptuar rrezikun për shkak
të tentativës për t’u ndarë përfundimisht me të. Kur e kanë parë ardhjen e tij, dy motrat që po hanin bukë, kanë tentuar të mbyllin derën, por ai ka qëlluar me armë, duke i lënë të vdekura në vend. Kristina Bardhi dhe Zhaneta Metani, ishin në banesën e tyre paraditen e 31 dhjetorit, së bashku me dy fëmijët e njërës prej tyre kur u qëlluan me armë zjarri. Autori i krimit bashkëjetonte prej disa vitesh me Kristinën, ndërsa kjo e
fundit i kishte kërkuar ndarjen. Ky duket se ka qenë shkaku që çoi në konflikt midis tyre deri në përdorimin e armëve të zjarrit. Ngjarja u pasua me detaje tronditëse, ku vëllai i motrave deklaroi se Ademi
kishte shitur në Greqi 10 fëmijët e lindur me motrat Metani. Pas akt-ekspertimit psikik të të pandehurit, Përparim Ademi rezultoi i aftë mendërisht, ndërsa krimi pati si shkak motivet e xhelozisë.