Skema e re, pensionistët që shmangin deri në 9500 lekë në muaj detyrime
Përfitojnë ata që janë të vetëpunësuar në sektorin privat. Pas miratimit të ndryshimeve ligjore s’do paguajnë më kontribute
Janë rreth 1500 pensionistë që vijojnë të jenë pjesë e tregut të punës, të cilët do të shmangin deri në rreth 9500 lekë detyrime në muaj. Kjo pasi qeveria ka vendosur të çlirojë këtë kategori nga barra e kontributeve. Ligji i ndryshuar është prezantuar për konsultim publik, ndërsa efekti financiar vlerësohet të jetë rreth 170 milionë lekë ose rreth 1.7 milionë dollarë. “Projektakti që paraqitet për shqyrtim bën pjesë në aktet ligjore që përcaktojnë dhe saktësojnë procedurat për zbatimin e dispozitave të legjislacionit të propozuar nga Këshilli i Ministrave për lehtësimin e përfituesve të pensionit të pleqërisë, të cilët vetëpunësohen në sektorin privat nga barra e pagimit kontributeve, duke qenë se atyre koha e vetëpunësimit nuk u njihet si periudhë sigurimi. Aktualisht, janë 1 484 përfitues të pensionit të pleqërisë të vetëpunësuar në sektorin privat, të cilët paguajnë kontribute çdo muaj në masën 14,151,424 lekë, të cilat kalojnë në fondin e sigurimeve shoqërore. Shuma 169,817,088 lekë në vit me hyrjen në fuqi të këtyre ndryshimeve do të zbritet nga të ardhurat në fondin e sigurimeve shoqërore”, thuhet në relacionin që shoqëron draftin.
PENSIONISTËT QË PUNOJNË
Janë mbi 80 mijë persona që vijojnë të jenë pjesë e tregut të punës edhe pse kanë mbushur moshën e daljes në pension. Në këtë fazë të parë janë përjashtuar vetëm pensionistët e vetëpunësuar në sektorin privat, të cilët pas zyrtarizmit të ligjit nuk do të kenë më detyrimin që të paguajnë më kontribute. Ligji aktual përcakton që personat që punojnë të marrin 6 për qind shtesë pensioni në vit nëse gjatë kohës që punojnë tërheqin vetëm pagën. “I siguruari, i cili ka plotësuar kushtet për pension pleqërie, sipas nenit 92 të këtij ligji, merr shtesë në masën 0.5 për qind të pensionit për çdo muaj që shtyn datën e daljes në pension dhe vazhdon të paguajë kontribute. Përfituesi i pensionit të pleqërisë, që ndërpret pensionin, vazhdon të punojë dhe paguan kontribute, merr shtesë mbi pension në masën 0.5 për qind për çdo muaj ndërprerjeje. Kjo shtesë llogaritet mbi atë masë pensioni që rezulton pas rritjeve dhe indeksimit që ka pësuar pensioni gjatë kohës së ndërprerjes”, specifikohet në ligj. Në momentin që zgjedhin të marrin edhe pagën edhe pensionin në të njëjtën kohë nuk aplikohet shtesa me 6 për qind.
SKEMA
Këtë vit mosha e daljes në pension për burrat vijon të jetë 65 vjeç, ndërsa për gratë është rritur me dy muaj edhe këtë vit, nga 61 vjeç e 2 muaj që ka qenë është bërë 61 vjeç e 4 muaj. Kjo rritje do të vijojë deri në vitin 2032, ku mosha e daljes në pension për femrat do të jetë 63 vjeç. Skema parashikon që “portofoli” i sigurimeve të rritet me 4 muaj për çdo vit. Kjo nuk vlen vetëm për gratë, por edhe për burrat, të cilët për të marrë pension të plotë duhet të plotësojnë dy kushte: së pari, moshën 65 vjeç, e cila nuk ndryshon deri në vitin 2032 dhe së dyti, vitet e punës, ku për këtë vit pragu është 37 vite e 8 muaj.