Përjashtimi i Berishës, Basha: U soll si kreu i organizatës kriminale që tentoi të vriste
“Berisha dhe mbështetësit e tij s’kanë pretendime ndaj legjitimitetit tim, por duan të zhvlerësojnë ‘non grata’-n amerikane”
Kryetari i Partisë Demokratike, Lulzim Basha, thotë se arsyeja e përjashtimit të Sali Berishës nga Partia Demokratike është fakti se më 8 janar, sipas tij, lideri historik nuk u soll si politikan, por si drejtues i një organizate kriminale.
Më tej, Basha, gatë një interviste për “ABC”, u shpreh se ditën e shtunë u tentua që të vriteshin funksionarë të Pd-së, të cilët ishin në krye të detyrës teksa po protestohej. “Në politikë futemi me vullnetin tonë dhe një nga përpjekjet kryesore të jetës sime politike është t’i çliroj shqiptarët nga mentaliteti që të solli ky dhe të hoqi ai. Sali Berisha është përjashtuar me unanimitet nga Kryesia e Partisë Demokratike ditën pasi vendosi të sillej jo si politikan, por si kreu i një organizate kriminale antikombëtare, antiamerikane dhe provoi tentativën e vrasjes të një grupi drejtuesish dhe anëtarësh të Partisë Demokratike në selinë e Partisë Demokratike, pasi kishte nisur një fushatë të nxitjes së dhunës, të gjuhës së urrejtjes, të përçarjes së demokratëve për të shkatërruar Partinë Demokratike siç e paralajmëroi vetë, që nëse Partia Demokratike nuk do të kthehej në bunker për hallin e tij personal, ai do ta shkatërronte, nuk e meritonte të ekzistonte”, tha kreu i Pd-së. Ndërkohë, ai paralajmëroi se edhe pjesa tjetër e atyre që u pezulluan do të përjashtohen nëse nuk distancohen nga dhuna. “Nuk ka dritë jeshile për asnjërin. Të gjithë janë përjashtuar nga Partia Demokratike. Të pezulluarit kanë një mundësi të distancohen nga dhuna dhe distancimi i tyre nga dhuna do të vlerësohet nga institucionet e partisë. Mosdistancimi i tyre deri në këtë moment flet qartë për fajin e tyre”, tha Basha. “TREKËNDËSHI I BERMUDËS” Kryedemokrati Basha është i vetëdijshëm për kundërshtarët që ka përballë, që sipas tij përdorin çdo mekanizëm, madje edhe ato jashtëligjore për të ruajtur këtë statuskuo, por ai shprehet se është i bindur që shqiptarët do të mund të bëjnë diferencën mes “Trekëndëshit të Bermudës” dhe zgjedhja e së ardhmes siç thotë ai. “Të gjithë shqiptarët i druhen që ‘Trekëndëshi i Bermudës’ do të përpijë të ardhmen e tyre, do t’i largojë të gjithë fëmijët
e tyre, do të shkatërrojë ekonominë, do t’ia dorëzojë atë oligarkëve. Ndërsa unë jam këtu për t’u thënë që keni shpresë, keni besim. Trekëndëshi i Bermudës, oligarkët dhe kriminelët, nuk do të na marrin dot peng përgjithmonë. Boll e kanë marrë peng këtë vend, 30 vite tranzicion, 8 vite regjimi kriminal, oligarkik që kanë shkatërruar ekonominë e shqiptarëve, ka shkatërruar themelet e bashkëjetesës demokratike, por ora po troket dhe jo për shqiptarët, por për Trekëndëshin e Bermudës. Njësoj si Edi Rama, edhe Ilir Meta dhe çdokush tjetër e shikon këtë si një mundësi për t’i zgjatur jetën tranzicionit, nga i cili përfitojnë aktorët e tranzicionit. Për ne është e qartë: Beteja është midis së shkuarës dhe së ardhmes. Demokratët kanë folur qartë në Kuvendin Kombëtar, kanë folur qartë në aktet dhe veprimet e tyre. Shqiptarët duan të ardhmen, demokratët kanë zgjedhur të ardhmen, kanë zgjedhur t’i prijnë betejës për të ardhmen. Nuk ka për të qenë piknik, kemi përballë forca të errëta, forca kriminale, forca që sot zotërojnë financat dhe ekonominë e vendit, por një gjë është e sigurt: Historia na mëson që pakica mbetet pakicë. Dhe shumica dërrmuese e shqiptarëve është forca jonë, është frymëzimi ynë, është motivi ynë”, vijoi Basha.
VOTËBESIMI
Sakaq kreu i selisë blu përjashton çdo mundësi për zgjedhje të reja në Partinë Demokratike. Sipas Bashës, problemi i Sali Berishës dhe i mbështetësve të tij nuk është me legjitimitetin e tij, por ata kërkojnë të zhvlerësojnë shpalljen non grata. “Jo, nuk kanë pretendime ndaj legjitimitetit tim ata. Ata duan të zhvlerësojnë non gratën amerikane dhe prandaj i është bashkëngjitur dhe Edi Rama, edhe Ilir Meta, edhe Aqif Rakipi, edhe Tom Doshi, edhe oligarkët. Sepse non grata amerikane për korrupsion domethënës, iu varet mbi kokë si “shpata e Demokleut”. I pari dhe më i shqetësuari është Edi Rama. Këta i bashkon një hall i madh, i bashkon mundësia që mund t’i vijë fundi kulturës së pandëshkueshmërisë dhe duan ta asgjësojnë të vetmin formacion politik, të vetmen familje politike që është në krah të shqiptarëve, në krah të luftës kundër korrupsionit, që është shpallur interes kombëtar i Shteteve të Bashkuara, nga Presidenti Biden dhe që në fakt është interes kombëtar i Shqipërisë dhe i shqiptarëve. Pse? Sepse është armiku i mirëqenies së shqiptarëve. Pse s’kanë punë, pse s’kanë akses nëpër institucione? Pse nuk marrin shërbimet e duhura? Pse i këpusin me gjoba? Sepse nuk është thjesht një shtet i korruptuar, është shteti i të korruptuarve. Duke nisur me Edi Ramën dhe bandën e tij dhe duke vazhduar me të gjitha segmentet e tjera të pushtetit, por edhe të aktorëve të tjerë të tranzicionit 30-vjeçar”, vijoi Basha.
Historia na mëson që pakica mbetet pakicë. Dhe shumica dërrmuese e shqiptarëve është forca jonë, është frymëzimi ynë, është motivi ynë