Zotimi për turizmin, Basha: 10 euro subvencion për çdo turist
Kreu i PD: Mbështetje financiare për kontributet dhe pagën minimale të punonjësve deri në kthimin në normalitet
Kryetari i Partisë Demokratike, Lulzim Basha, angazhohet se nëse ulet në karrigen e Kryeministrit pas ditës së diel, do të ofrojë një paketë ndihme për biznesin në sektorin e turizmit.
Marrë shkas nga situata që ka kaluar Shqipëria për shkak të pandemisë dhe tërmetit, më herët kryedemokrati firmosi dje një marrëveshje me shkrim me Unionin Turistik Shqiptar, ku zotohej se do të unifikojë TVSH-në 6% për të gjitha hallkat e turizmit. Do të ofrojë paketa financiare për pagën minimale deri në normalizimin e situatës. “Mbështetje financiare për kontributet dhe pagën minimale të punonjësve deri në kthimin e situatës në normalitet. Lehtësimin e kompanive që operojnë në sektorin e turizmit nga detyrimet fiskale deri në kthimin e situatës në normalitet. Në këtë kuadër, ne do të bëjmë shqyrtimin e aplikimit të pragut të TVSH-së në 6% për të gjitha hallkat e turizmit, duke e njehsuar atë me akomodimin në mënyrë që t’i jepet përparësi të gjithë industrisë, duke qenë që sistemi i sotëm i diferencimit nuk ka prodhuar eficencën e kërkuar dhe të duhur të këtij sektori. Akordimi i fondit të posaçëm për rritjen e nivelit të promovimit të Shqipërisë turistike, duke përfshirë edhe rrjetin tonë diplomatik në veçanti sa u përket vendeve të rajonit, të Bashkimit Europian, por dhe të tregjeve të tjera me potencial të lartë, siç janë vendet e Azisë”, tha Lulzim Basha.
RIMBURSIMI Për të stimuluar ardhjen e turistëve të huaj në Shqipëri, kryedemokrati Basha tha se për çdo turist që do të qëndrojë mbi 5 ditë në Shqipëri qeveria do të subvencionojë 10 euro. “Akordimi i një fondi të veçantë për subvencionimin me 10 euro për çdo person për turizmin hyrës përmes operatorëve turistikë, të cilët mundësojnë prurjen e turistëve të huaj në mënyrë të organizuar dhe që akomodohen minimalisht 5 net në Shqipëri. Këto janë disa prej angazhimeve që ne i marrim sot bashkërisht me një qëllim të vetëm të cilit do t’i shërbejmë nga 2 drejtime të ndryshme, rritjen e këtij sektori, fuqizimin e këtij sektori, nxjerrja e këtij sektori nga kriza 8-vjeçare e në veçanti nga traumat e këtyre 2 viteve dhe qëllimi është që përmes kësaj të ndihmojmë rritjen ekonomike, shtimin e vendeve të punës, shtimin e të ardhurave dhe të mirëqenies të dhjetëra-mijërave të punësuarve dhe dhjetëra-mijëra familjeve shqiptare që varen drejtpërdrejt nga ky sektor me impakt, po kështu edhe në sektorë të tjerë, siç është ai i bujqësisë, i agrobiznesit, i zejtarisë, i artizanatit dhe shumë sektorë të tjerë të ekonomisë, të cilët pa diskutim do të përfitojnë nga masa lehtësuese në tërësi për ekonominë, por edhe nga fuqizimin i sektorit të turizmit në veçanti”, vijoi Basha.
AKUZA Kryedemokrati Basha ndërkohë akuzoi Kryeministrin Rama se në këto 8 vite, nisur nga premtimet e bëra, sektori i turizmit është një nga sektorët më të dështuar në këto 8 vite. “Mund të themi me gojën plot se në raport me premtimet e para 8 viteve, turizmi është ndër dështimet më të spikatura të kësaj qeverie, ndaj duke marrë përsipër barrën e përgjegjësisë me të cilën do të na ngarkojnë shqiptarët të dielën e ardhshme, me 25 prill, ne marrim përsipër edhe masat konkrete për t’i dhënë oksigjen ekonomisë, për t’i dhënë oksigjen turizmit, 25% të ekonomisë mbi 90 mijë familjeve shqiptare që varen drejtpërdrejt nga avancimi, nga ecja përpara e këtij sektori. Këtu në veçanti dua të prek tri çështje të cilat janë të materializuara tashmë në këtë marrëveshje, siç është ai i krijimit të një instrumenti të veçantë financiar në bashkëpunim me sektorin bankar, për të mundësuar kredi me kushte lehtësuese për kompanitë e sektorit, me norma të ulëta dhe të subvencionuara të interesit bankar. Ka pasur tetë vite kohë për t’i zgjidhur këto probleme, jo vetëm nuk i ka zgjidhur, jo vetëm nuk i ka mbajtur premtimet, por ka dështuar t’ju ndihmojë edhe pas dy goditjeve të njëpasnjëshme që industria juaj ka përjetuar. Por nga ana tjetër, kjo marrëveshje tashmë dëshmon se qeveria e ardhshme prioritet të vetëm ka mirëqenien e qytetarëve shqiptarë, zhvillimin e ekonomisë dhe përparimin e vendit në çdo fushë. Kështu që ju ftoj bashkërisht të nënshkruajmë marrëveshjen e cila i përkthen të gjitha këto angazhime të planit në zotime konkrete për sektorin tuaj”, vijoi kryedemokrati.
10 euro për çdo person për turizmin hyrës përmes operatorëve turistikë, të cilët mundësojnë prurjen e turistëve të huaj në mënyrë të organizuar dhe që akomodohen minimalisht 5 net në Shqipëri. Këto janë disa prej angazhimeve që ne i marrim sot bashkërisht me një qëllim të vetëm të cilit do t’i shërbejmë nga 2 drejtime të ndryshme...