Shtëpitë pa legalizim, si kompensohen familjet
Zbardhen tri skemat e kompensimit për shtëpitë që nuk përfshihen në procesin e legalizimit. Nga paratë në dorë, te përfshirja në programet e strehimit, si do përfitojnë 90 mijë familje
Asnjë shtëpi nuk do të shembet, pa marrë më parë qytetarët paratë e kompensimit.
Këtë bëri të qartë edhe kreu i Kadastrës, Lame, teksa tha se janë mbi 90 mijë objekte të skeduara jashtë procesit të legalizimit pasi bien me kriteret e kualifikimit.
TRI FORMAT Në ligjin “Për përfundimin e proceseve kalimtare të pronësisë” përcaktohen tri forma kompensimi për familjet që përjashtohen nga legalizimi. “Poseduesit e ndërtimeve pa leje që nuk legalizohen, sipas nenit 18 dhe pikës 4, të nenit 29, të këtij ligji, trajtohen nga shteti nëpërmjet shpërblimit financiar, programeve sociale të strehimit, ose formave të tjera alternative të trajtimit. Këshilli i Ministrave përcakton mënyrat e trajtimit dhe të përllogaritjes së masës së shpërblimit financiar, format alternative të trajtimit, si dhe rregullat dhe afatet për realizimin e tyre”, specifikohet në nenin 33 të ligjit. Pra, krahas shpërblimit financiar, alternativë janë edhe banesat sociale apo kreditë me interes të zbutur. Janë më shumë se 90 mijë objekte të tjera që s’mund të bëhen pjesë e procesit. Kështu nuk mund të legalizohen objektet në afërsi të rrugëve, objektet e ngritura në zonat e mbrojtura, në muze etj. Ajo që bën diferencën është fakti që vlera e kompensimit nuk do të jetë e plotë, por do të jetë e barasvlershme me vlerën e investimit. “Pikë kyçe që ka ndryshuar është që nuk prishen më objekte pa marrë shpërblim për objektin. Qytetarët marrin një dokument ndërmjetës që përcakton sa është sipërfaqja e objektit. Ditën që aty kalon një projekt, nuk prishet më shtëpi pa marrë shpërblim. Pra, këta banorë nuk dalin në rrugë. Ka disa opsione për trajtimin e këtyre familjeve nga shpërblimi te trajtimi me banesë sociale etj.”, ka pohuar më herët kreu i Kadastrës.
NDRYSHIMET Nga ana tjetër, rishtazi në skemë janë përfshirë ndërtimet pa leje të ngritura në afërsi të linjave të tensionit të lartë. Prej disa muajsh, në bashkëpunim me Ministrinë e Infrastrukturës, Agjencia e Kadastrës ka nisur punën për zhvendosjen e këtyre linjave që kanë bllokuar procesin e legalizimit. Një praktikë e tillë ka nisur në Tiranë, ndërsa shumë shpejt do të mund të shtrihet në të gjithë vendin. Janë me dhjetëra familje që do të çlirohen nga ky kufizim duke përmbyllur në këtë mënyrë edhe procesin e pajisjes me dokument pronësie për objektin dhe truallin në të cilin kanë ndërtuar pa leje. Kjo u konfirmua edhe nga drejtori i Përgjithshëm i Agjencisë së Kadastrës Artan Lame, i cili në një dalje për mediat tha se spostimi i linjave të tensionit nga zonat e banuara do të bëjë të mundur formalizmin e këtyre objekteve. “Jemi koshientë të gjithë që s’mund të realizohen legalizime në zonat e mbrojtura, zonat muze. Ne në bashkëpunim me Ministrisë së Infrastrukturës ndërtimet poshtë linjave të tensionit të lartë. Mistria po bën një spostim të këtyre linjave, sepse nuk mund të kesh linja të tensionit të lartë në zonat e banuara. Jemi duke e bërë këtë duke i zhbllokuar në këtë mënyrë edhe procesin e legalizimet për familjet që preken”, tha Lame.