Ambasadorja amerikane Kim rrit presionin kundër krimit zgjedhor në Shqipëri
“Mos e shisni të drejtën tuaj! Mos ua dorëzoni fuqinë tuaj kriminelëve! Edhe SHBA do ketë vëzhguesit e vet në zgjedhje”
Me afrimin e ditës së zgjedhjeve, është shtuar edhe presioni i ambasadores amerikane në Shqipëri, Yuri Kim, kundër shitblerjes së votës.
Kur na ndajnë edhe 25 ditë nga dita e zgjedhjeve, kryediplomatja iu drejtua në mënyrë të drejtpërdrejtë qytetarëve shqiptarë, duke u bërë thirrje që të mos votojnë kriminelët. Ajo u kërkon qytetarëve shqiptarë që të mos shesin votë. Ajo u kujton të gjithë shqiptarëve se kanë rolin thelbësor që të zgjedhin udhëheqësit për 4 vitet e ardhshme. “Mos e shisni të drejtën tuaj. Mos ua dorëzoni fuqinë tuaj kriminelëve. Vetëm ti mund ta zgjedhësh të ardhmen tënde”, shkroi diplomatja amerikane në rrjetin social “Twitter”. Këtë reagim kryediplomatja amerikane e bëri teksa shpërndau një postim të mëparshëm që bëri dje Komisioneri Shtetëror i Zgjedhjeve, Ilirjan Celibashi, i cili u bëri thirrje qytetarëve që të denoncojnë rastet e shitblerjes së votës. “Qytetarë! Raportoni dhe denonconi rastet korruptive të shitblerjes së votës! Raportoni dhe denonconi rastet e financimit të paligjshëm të fushatës zgjedhore! Që prej datës 10.03.2021”, shkroi Celibashi, ndërsa bën publik edhe portalin e denoncimeve. (http://kqz.gov.al/kallzo). Po ashtu, ambasadorja amerikane zhvilloi dje një takim edhe me drejtuesen e misionit të OSBE/ ODIHR. Në përfundim të takimit, kryediplomatja tha se edhe SHBA do të ketë vëzhgues të zgjedhjeve në Shqipëri. Madje, ajo tha se do të angazhohet edhe vetë. “Diskutuam me ambasadoren Urszula Gacek, kryetaren e OSBE/ ODHIR për vëzhgimin e zgjedhjeve në Shqipëri dhe për përgatitjet për zgjedhjet 4/25. SHBA mbështet këtë mision të rëndësishëm, përfshirë edhe vëzhguesit kontribuues. Ambasada amerikane gjithashtu do të dërgojë ekipin e saj (duke përfshirë edhe mua) në vende përreth vendit”, shkroi ambasadorja Kim.
KËRKESA
Me afrimin e datës së zgjedhjeve, e dërguara e SHBA në vendin tonë, Yuri Kim, ka qenë më e drejtpërdrejtë në mesazhet e saj për qytetarët. Më 25 mars, kur u hap zyrtarisht fushata zgjedhore, përmes një deklarate zyrtare, selia diplomatike e SHBA në Shqipëri u bëri thirrje partive politike që të debatojnë për programet dhe jo të ashpërsojnë gjuhën kundër njëra-tjetrës. Ndërkohë, qytetarëve u bëri një thirrje të qartë: që të votojnë atë forcë politike që ofron partneritet me SHBA-të dhe integrimin në Bashkimin Europian. Këtë, ambasada e bëri pikërisht në ditën që nisi fushata, ku në fjalën e tij Kryeministri Rama nuk e përmendi në asnjë rast procesin e integrimit ndërsa kryedemokrati Basha e vendosi si mision kryesor të politikës së tij madhore. “Ne u bëjmë thirrje të gjithë partive, udhëheqësve dhe votuesve që të përfshihen plotësisht dhe me përgjegjësi në ushtrimin e të drejtave dhe përgjegjësive të tyre. Nxisim partitë të paraqesin ide dhe kandidatë që pasqyrojnë respekt për votuesit. Presim nga udhëheqësit që të shfaqin udhëheqësi, përfshirë edhe duke u siguruar që partitë dhe kandidatët e tyre sillen në përputhje me ligjet elektorale dhe standardet ndërkombëtare, duke refuzuar qartë dhunën dhe duke treguar se ata me të vërtetë do të ishin të denjë për të udhëhequr dhe përfaqësuar Shqipërinë. Nxisim votuesit t’i mbajnë partitë dhe kandidatët përgjegjës, të marrin në shqyrtim zgjedhjet që kanë dhe të votojnë për ato parti dhe kandidatë, të cilët ofrojnë të ardhmen më të mirë për Shqipërinë – një e ardhme në partneritet me Shtetet e Bashkuara, që e shtyn Shqipërinë drejt anëtarësimit të plotë në familjen europiane si një demokraci e fortë dhe e begatë. Edhe media duhet të luajë rolin e saj me përgjegjësi dhe etikë, duke bërë pyetje të vështira në emër të publikut dhe duke kërkuar përgjigje të vërteta nga kandidatët. Presim gjithashtu që shoqëria civile të luajë rolin e saj të rëndësishëm gjatë gjithë procesit zgjedhor”, shkruhej në deklaratën e ambasadës së SHBA më 25 mars.